Ningani khan India medal beiseina lian pakhat PV Sindhu chuan Olympics women’s singles round of 16 match paltlang zo loin Chinese He Bing Jiao lakah a tlawm a, ram tana Olympic lo awm leh turah a inlan zui leh a tum dawn em tih zawhna a chhang mumal thei ta lo!
Kum 29 mi chuan, “Kum li nghah la ngai tur a ni a, tun dinhmunah chuan haw phawta chawlh han lak hlek rih ka duh a, chu mi hnu lamah ka lo kir leh ang a, kan la ngaihtuah turah ngai ila, chutih rualin kum li hi a rei ve em a, engmah sawilawk theih a ni lo a, kan la hre chhawm zel ang chu,” a ti.
PV Sindhu hian rinloh taka a tlak hma tak viau chhanah inbuatsaihna lam a mawhpuh duh lo a, a khelh that theih dan bera khel thei turin a inbuatsaih tha tawk tih sawiin, women’s singles pre-quarter-final a paltlang zo ta lo erawh defende lama tihsual a neih leh thin vang niin a sawi.
World number nine ni chunga Paris-a inlan Chinese Jiao khan Indian star unforced error neih tam a thatpui a tih theih a, minute 56 chhunga 21-19, 21-14 hnehna changin Olympics medal pahnih awrh tawh a hneh.
Tarlan tawh thin angin, Sindhu hian 2016 Rio Games-ah khan silver medal awrhin, a dawtleh Tokyo Games-ah India tan bronze a hlawhchhuak leh a, Olympic gold medal beiseina nen Paris a pan a, Bing Jiao paltlang zo loin a tum ram a thleng zo leh ta rih lo a ni.
Sindhu hian Paris Olympic gold lak tumin Germany ramah training camp a lut a, chu mai duhtawk loin Indian badminton icon Prakash Padukone kaihhruaina hnuaiah inbuatsaihna a kalpui bawk a, chuti chungin Olympics medal pahnih a lak tawh a belhchhah zo ta lo a ni.
Sindhu hmalam hun a chiang lo
