Indian Defence Minister Rajnath Singh-a chu Nilaini khan Tokyo a thleng a, Japanese Defence Minister Shinjiro Koizumi-a’n a lo dawngsawng.
A thlen hlim hian Japanese defence ministry hian zahna hlanin an lo hmuak a ni.
Defence minister hi External Affairs Minister (EAM) S Jaishankar-a nen Nilaini zing khan Japanese khawpui hi 4th India-Japan Foreign and Defence Ministers’ Meeting (2+2)-a tel turin an thleng a ni.
Singh-a leh Jaishankar-a te hi Japan-a India palai, Nagma Mallick leh Deputy Chief of Mission (DCM) Madhu Sudan ten an lo hmuak bawk.
Indian Embassy chuan, “External Affairs Minister Dr S Jaishankar-a’n Tokyo-ah Fourth India-Japan Foreign & Defence Ministers’ Meeting (2+2)-a tel tur leh Nineteenth India-Japan Foreign Ministers’ Strategic Dialogue-a tel turin a lo thleng a. Tokyo a lo thlenin Ambassador Mallick-a leh DCM ten an lo hmuak a ni,” an ti.
Koizumi-a nena an inkawm bakah Singh-a leh Jaishankar-a hian 2+2 Ministerial Dialogue an kaihruai ang a, Japan atangin Koizumi-a leh Foreign Affairs Minister Toshimitsu Motegi ten an ho bawk ang.
Inbiaknaah hian ram pahnihte hian ram venhimna leh thil pawimawh danga an thawhhona kal mek leh huang zauh dan tur te, an chhehvel leh khawvel huapa thil thleng te an sawi ho dawn a. Indo-Pacific huam chhunga zalen, inhawng leh dan behchhana thil a kal theihna tur hrang hrangte an sawiho dawn bawk niin defence ministry (MoD) chuan a tar lang.
Singh-a Koizumi-a inkawm tur hi kumina ram pahnih defence minister-te an inbiak vawi thumna a ni dawn a ni.
August-a New Delhi leh October-a Cebu-a ASEAN Defence Ministers’ Meeting-Plus-a an inkawm tum khan ram venhimna technology leh equipment-a thawhhona te, tuipui himna tihchak dan tur te, sipai chi thumte nunchan zirhona huang tihzauh te, industry kaihhnawiha thawhhona turte an sawi dun a ni.
MoD-in tun tuma Singh-a’n Tokyo a tlawh tur chungchanga thuchhuah a siamah, “Ram venhimna thila thawhhina thuk zawk siam leh ram pahnih inkara beihpui thlakna leh industry kaihhnawiha kal dun zel dan tur kalhmang duante chin fel a tel a ni,” an ti.
A zin chhuah hma, Thawhlehni khan Singh-a hian a zinnaah hian rei tak an thawhpui tawh ram nena an inkungkaihna tingheta awmze nei taka sawihona an kalpui a beisei thu a sawi bawk.
Singh-a leh Jaishankar-a ten Japan tlawh mek

