Dr. Lalsiamhnuna
A area a chengte leh an bul vela mite lak nat ber leh tharum hial an thawh chhan bulpui ber nia lang chu “Hmar thimpui zangkhaw bungbut hnan,”tih hi a ni. Hnam leh a bial mipuite hmuhsitna leh elsenna-ah an ngaia, Development thlawh khum, bial dangte aia hnufum zawk niin an inhria a, an hnufum chhan pawh ngaih thah an nih vang ni berin an hria a, HPC movement a lo chhuah phah ta reng a ni. Chu lah chu – ‘Chi bing politics, Mizo hnam inpumkhatna tichhetu..’tiin Kohhran leh NGO leh tlawmngai pawl zawng zawngin kan hnawl ti tih a nih kha. A tawp a tawpah Congress Sawrkarin Inremna (Agreement) a siampuia, Sinlung Hills Council (a tirah chuan Sinlung Hills Development Council tih a ni)’ a lo piang ta a. A lawmawm khawp mai. Chutih rualin, an Inremna Thuthlung erawh chu rei tak bawhzui (implement) lovin a awm. A area chhungah pawh hmasawnna hmel hmuh tur a awm lem lo bawk. Mipui lam pawh an rethei ngaiin an la rethei reng.Thil lawmawm deuh mai pakhat erawh chu a Council hming a hnam hming lang lova Sinlung Hills Council tih a lo ni ta hi a ni. Chhim lama kan Autonomous District Council pathumte saw hnam hming chawi veka din an nih avangin Zofate Inpumkhatna kawngah harsatna siamtu-ah mi tam takin an ngai a, hmar lama kan unauten an tih leh lek phei chuan kan inthik zel ang a, nakinah chuan ‘Mizo’ tur hi kan la awm lo thei hial mai ang a’ tih thawm hriat tur a awm mek laiin, rin loh takin, inpumkhatna lam an hawi a, kan pi leh pute lo chhuahna nia kan hriat, kan sawi hlat ber, an thlang tlak hma a an lo chen thinna khua/hmun SINLUNG (CHHINLUNG) hming chawia Council a lo piang ta mai kha a fuh khawp mai.
MNF a lo sawrkar leh a (2018), Inremna rawn bawhzuiin, Council Area leh bial te ruahmanin, Inthlanna Felfai tak a nei pui ta mai a. Mi tam tak mak tih a tling. A lawmawm tak zet a ni. A tha zawngin thil a inher chho ta zel a nih kha.
Inthlan vawi khatna (term hmasa)a thlan tlin, Council member 12 te khan phur takin hma an han la sang sang a, an chet that leh that loh chu thu hran, kha Council khan Term khat chu a hmang zo ta der mai. An hun chhung khan anmahni puala Budget awm ve ta na na na chu hlawh an nei a, hna an thawk a, bial an vil ve thin. Hmasawnna hmel thar awm em em lo mah se, MLA te thlazar hnuaiah Bial tana thil tangkai tak tak pawh an thawk nual awm e. Chu chu Development chi khat chu a ni tawh hrim hrim.
Thil lawmawm deuh mai pakhat leh chu, he Sinlung Hills Council Inthlan vawi hnihna (2024)ah hian ‘chi bing’ tih lam reng reng a lang lo hi a ni. Mipuiin kan ngaihven a, sawrkar dinglai leh eptu lam party zawng zawng kan phur em em vek mai a. A mak zawk.
Inthlan result a lo chhuak a, MNF an chaka, rorel lai ZPM party pahnihna an nih tak avangin sawi a tam a. Sawi duh dan erawh a inang lo.
Ka hmuh dan:
An sawrkar laia remna siampuitu an nih avangin, Congress khan vote an hmu hnem, Pa khat pawh a tling nghe nghe. An inremna thuthlung an bawhzui loh avangin bial mipuite duhsakna famkim an dawng ta lo mai a ni.
Independent Candidate te an tha hlawm viau na a, party lian inbeihna na tak karah din chhuahna khua a kaw thlawt lo a ni ber. Vui suh se.
MNF an chak kha a awm khawp mai. An that thinna bial, Council ruang-am duangfela Inthlanna buatsaihtu an nih miau avangin an phu hliah hliah. An sawrkar lai phei chu ni se, an la fai vek hial ang chu. Kum rei tak chhung Tuivai lei (tui lianin a tihchhiat) hlam chhiah tawh (anmahni ngei tel ve na) chu an hun chhunga engkim peih vek a, an term a tawp avanga zo hman ta lo ang lekin an in sawi thiam a, an tan Inthlanah plus point a ni. An lawmpui awm khawp mai.
ZPM party a siruk lain an thawk chhuak a, 4 tlingin pahnihna an hauh va. An beisei an pha lo hle niin a lang. Lunglei Municipal Council Inthlan nen khaikhinin che chhe ta riauvin an inngai a ni mai thei; mi tam tak pawhin an ngai. Mahse, a dik lo vang. Lunglei Inthlan kha chu ZPM thli tleh vanglai, CM (hlui) bial leh Lunglei District pumpui khaikhin rem em em lai leh MNF tlakchhiat laia inthlan a nih kha. Tun tuma, SHC Inthlan erawh hi chu sawrkar hmelchhiat lai- tuialhthei man tihsan, Ration Card siam that, aikal tihtawp, zirtirtu indaih loh leh School upgrade, upgrade leh lo,ldt., siam that hna ni si, a rah hmuh tur la awm tak tak bawk si lo laia inthlan a ni a, vote thlak ho kha a tam ber mahni awmna party-a nghet bur deuh vek leh Bial zim te te, chhungkaw hung leh laina leh hmel hriat ngah te awm ze nei lai leh Council member-te ram hnuk khawih pha lova ngai tlat te vote thlak that loh hun lai a nih bawk avangin kha tiang result kha a lo chhuak ta a ni.
Inthlan result-ah MNF an lawm a, a awm khawp mai, an tan sauh sauh erawh a pawimawh reng ang. Congress pawh lawm tur an ni, an lehthalte an hrawl tlat. Inthlahdah erawh a thiang lo. ZPM pawh lawm rawh se. An che chhe hran lo. An tum leh an sawi anga an awm a, tlawmna puan sin a, fimkhur taka an kal ngat chuan, SHC area chu bial him a ni mai. A nih loh erawh chuan chuti hlauh.