Sinner kutah ATP Finals title lut leh

Sinner kutah ATP Finals title lut leh
Mipa singles tennis kum kharna 2025 ATP Tour Finals khelh zawh takah Pathianni zan khan champion lai Jannik Sinner chuan final-a a khingpui Carlos Alcaraz laka 7-6(4), 7-5 hnehna changin ATP Finals trophy nen kum a khar leh ta a ni.
Turin khaw final-ah hian tualchhung tlangvalin Italian mipui tan a hlawh hle a, game hnuhnungbera Spanish world number one leh tunlai tennis khawvela a elpui lian ber ni mek Alcaraz-a serve a break zo khelmual chhuata a bawh zangthal rualin Inalpi Arena chhunga mipui pungkhawm chu ‘Ole, Ole, Ole, Sinner, Sinner’ tiin an lo zai mup mup a, a hnuah Italian player hian amah tana thlawp tlattu a chipuite hnenah uar takin lawmthu a sawi nghe nghe.
Sinner chuan, “Italian mipui hma ngeia khati ang tawpna sualchhuah kha a tuiawm takzet a, nikum ai mah khan kumina ka hun tawn hi a la fuh zawk hialin ka hria a, awihawm loh khawpa min thlawpnaah hian lawmthu ka sawi e,” tiin nikuma kum kharna title a lak ai pawhin kumin hi ropui mah zawka a hriat thu a sawi.
Italian world number two hian football ngaihsanna rama tennis season kharna final-a a chipuite hmaa hnehna chan boruak chu football khelmual chhung boruak ang mai a nih thu a tarlang tel.
Karliamta khan round-robin match thuma Alcaraz a chak avangin Sinner hian Spaniard lakah world number one nihna a hum zo ta lo a, No. 1 ni chungin kum khar zo ta lo mah se tun hi a career-a a season tha ber a ni zui ta tho a ni.
Kum 24-a upa Sinner hian kuminah Grand Slam pali final thleng vekin, Australian Open leh Wimbledon-ah a champion a; final dang vawi hniha Sinner ve ve hnehin Alcaraz kutah Roland Garros leh US Open trophy a lut ve thung.
Sinner hian kum 2023 pawh khan Turin khawpuiah hian title match khel tawhin Novak Djokovic a ngam lo a, kha mi hnu erawh kha chuan indoor hardcourt-ah a tlawm duh ta reng reng lo a; he leilung bika match 30 chak zawn chungin kumin hian Turin final a khel a; season kharna tournament-a final a khelh zawn vawithuma a hnuhnung pahnihah a chak a, kum 2023 final-a a tlawm tum kha he competition-a Italian-in set a hloh awmchhun a la ni ngar ngar!
Pathianni season-ender hma kumin chhunga Alcaraz a hmachhawn vawi ngaah Sinner hi tum li ngawt a tlawm a, chu’ng a chak lohnate chu final match vek niin, Turin khaw final-ah erawh a dingchang zawkah a tang zui leh ta a, he tournament-a prize money tam ber tum record nen US dollar maktaduai 5.07 hlawh chungin chawlh a hmang thei ta a ni.