India leh Pakistan indo laia Chhamb hmuna India sipaite an chetthat avanga ‘Honour of Battle’ an hmuh hriatrengna Ni chu Thawhlehni khan Ex-Fighting Fifth Association Mizoram chuan an hmang.
He hun hmanpuitu MJA Gen. Hqrs. president C Lalrambuatsaiha chuan thalaite tan sipaia tan tam tha a tih thu leh Mizoten sipai officer kan la nei tam tawk lo chu hemi lama hma latu pawimawh tak Mizorama Sainik School tih changtlun zel a pawimawh tih a sawi. Nagaland pawhin anmahni puala regiment an nei angin Mizoten Mizo Regiment neih ve thuai tul a tih thu a sawi bawk.
5th Bn. Assam Regiment atanga pension chhuak intelkhawm – Ex-Fighting 5th Association (EFFA) ten an regiment-in kum 1971-a India leh Pakistan indonaa Chhamb hmuna an chetthat avanga Honour of Battle an hmuh hriatrengna hi kumtin December 5-a hman thin a ni a. EFFA-ah hian sipai bangte bakah indonaa pasalthate hmeithai, an pasalten an boralsan tawhte pawh an tel a. Kumin hian an member boral Zokaichhunga, Vaivakawn leh kum 1971 indonaa sipai 24 thite sunna leh hriatrengna hman nghal a ni.
Covid-19 leh harsatna dang avangin kumin May 22-25 inkar khan W. Bengal-a Kalimpong-ah kum 1971 India-Pakistan hnehna hriatrengna kum 50 tlin, Golden Jubilee hman a ni a, Mizoram atangin EFFA member 60 chuang an tel ve a ni.
Chhamb Battle Honour hi Sainik Welfare & Resettlement director Lt.Cdr Lalnuntluanga pawhin a hmanpui a ni.
Sipai hluiten hnehna hriatrengna Ni hmang
![](https://theaizawlpost.org/wp-content/uploads/tap_logo-min-large.jpg)