Daily Newspaper

Sipai lambun sual vangin mi 13-in nunna chan

32

December 4 tlai lam khanArmed forces personnel te chuan Nagaland a Mon district-ah civilian 13 lambunin an kaphhlum a, heng civilian-te hi coal miner te vek an ni.

Tualchhung mite chuan para commando-te hian heng coal miner te hi National Socialist Council of Nagaland (Khaplang-Yung Aung) mi leh sa te emaw tia ngaia haiin an lambun niin an sawi.

He thil thlenna hi coal mining area Tiru leh Oting-ah niin heng hmun pahnih te inkar hlatlam hi 15 km chauh a ni.

Tualchhung mi thinrim te chuan oting a security forces inkulhte chu zanah an bei let ve thung a ni.

Konyak Naga community apex body Konyak Hoho leader chuan heng coal miner-te hi pick-up van a an chenna In pana an haw lam lambun an nih thu a sawi a. Coal miner te hi kartinin inrinni-ah Pathianni an chhungte nena hmang turin an haw ziah a, thawhtanni-ah an kal leh thin tiin a sawi.

“Mi parukin December 4 tlai lamah lambun an nihna hmunah nunna chan nghalin, midang pasarih te chu December 5 zing lamah an hliam tuar lovin an thi a ni. Mi 13 in nunna chan tawhin midang 11 in hliam an tuar a, pahnih chin hriat lohin an awm mek bawk” tiin Konyak Hoho leader chuan a sawi.

State sorkar chuan he thil thleng chhui chiang turin high-level Special Investigation Team (SIT) a din nghal a, Army te pawhin dan ang thlapin SIT te thlawp an tum thu an sawi nghal bawk.

Mi parukte hi security forces ten hel member te emaw tia ngaihhaia an kahhlum an ni a, mipasarih te erawh tualchhung mi thinrim tena an beihletnaah mahni in ven nana security forces tena an kahhlum an ni thung.

Army’s 3 Corps ten thuchhuah an siamah intelligence report an dawn bawhzuiin hel pawlte chevel an awm nia an hriat thu an sawi a, hei vang hian Mon District a Tiru area-ah operation an nei tiin an sawi.

“Thil thleng leh a hnua thil thleng zelah pawi kan ti takzet a. vanduaithlak taka nunna chan awm te Court of Inquiry in a chhuichiang mek a, dan ang thlapa hremna lekkawh a ni ang” tiin 3 Corps chuan thuchhuah siamin an tarlang a. Security forces te pawhin hliam tuarin pakhatin nunna a chan thu an tarlang bawk.

Local official-te chuan National Socialist Council of Nagaland cadres te che vel an awm ngeia hrilh hriat an nih thu leh hei vang hian an awmna lai vela nia sawi chu an danchah nghal thu leh hel pawl tena an vehicle hman a rawng nen lam thlenga hrilh hriat an nih thu a sawi bawk.

Mahse, heng civilian te hi hel pawlte vehicle hman rawng nena inang vehicle-ah an chuang a, ding tura an tihin ding duh lovin security forces ten an kapzui ta a ni, tiin official chuan a sawi bawk a. A hmunah mi parukin nunna chanin pahnihin hliam an tuar bawk.

Security forces ten police lo thlen an nghah laiin tualchhung mi te pungkhawmin sipaite an bei let a, security forces pakhatin nunna chanin pathumin hliam an tuar bawk a. Sipai te hian mahni inven nan silai hmetpuak zuiin civilian pasarihin nunna an chan zui leh phah a ni, tiin official-te chuan an sawi.

“Thil thleng vanduaithlak tak Oting, Mon a civilian tena nunna an chanphahna chhan hi a demawm takzet a ni. Nunna chan chhungte kan tawrhpui takzet a, hliam te pawh an dam that thuai kan beisei a ni. High-level SIT in an chhui chiang nghal ang a, dan ang thlapin hremna lekkawh a ni ang” tiin Nagaland Chief Minister neiphiu Rio chuan a sawi.

Union Home Minister Amit Shah pawhin lungchhiatthlak a tih thu sawiin, “Nunna chan chhungte ka tawrhpui takzet a ni. State sorkarin high-level SIT a din chuan nunna chan chhung ten justice an hmuh ngei theih nan hma an la ang” tiin a sawi.

Local organisation-te chuan he thil thlenga mahwphurtu lakah hremna lekkawh ngei ngiatin national leh international human rights organisation-ah te thlen an tum thu an sawi bawk a. Nunna chan chhungte chuan rorelna dik an hmuh loh chuan an chhungte ruang lak an duh rih dawn lo an ti bawk.

Eastern Nagaland People’s Organisation (ENPO) te chuan State capital Kohima bul lawka Kisama a Hornbill Festival neih mekah an tribe parukte chu an inhnuhdawh tir nghal bawk.

“Kan mi leh sa te thah an nih laiin engtiangin nge festival-ah kan lam theih ang” tiin ENPO te chuan thuchhuah siamin an tarlang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy