Sipai luah rama ram neite chungchang ngaihtuah chawp dawn
Aizawla sipai luah rama ram lo neite ram neih chungchangah thu mum a la awm lo a, revenue minister Lalruatkima chuan hei hi buaipui mek a nih thu leh, ngaihtuah chawp zel tur a nih thu a sawi.
“Chutiang khatiang a ni han tih ngawt theih a ni lo a, chutiang chuan kan ti dawn tih pawh sawi lawk theih a ni lo. A tul ang zela ngaihtuah chawp ngai thil a ni,” tiin The Aizawl Post a hrilh.
Minister Ruatkima chuan sipai luah rama ram neite hi insawifiah turin sorkar a ti a, chu chu nghah a ngaih thu leh, an chhanna te zirchian a ngaih tur thu te, an chhanna atangin an dinhmun hriat theih a nih dawn chauh thu te a sawi.
“Ram neite hi an dinhmun a inang lo a, ram pek an nih hun a inang lo a, ram an neih dan pawh a inang lo niin a lang a. A enga mah hmaa lo hrut rual tawp pawh a rem lo mai thei a, chuvangin an rawn insawifiah ang a, an insawifiahnate chu zir phawt a ngai ang,” a ti.
Ram an neih hun leh ram an neih dan a inang lo tih a sawi a, NOC (No Objection Certificate) an neih leh neih loh te, ram pek an nih laiin sorkarin engtin nge a tih tih te, ngaihtuah tur hrang hrang a awm thu leh an insawifiahna hi nghah a ngaih thu a sawi bawk.
March ni 24 khan revenue department-in sipai luah rama ram neite hi ziaka insawifiah tura tiin show cause notice a pe a, ni 30 chhunga insawifiah tura tih an ni. Ram neitute zingah insawifiahna thehlut an awm tawh tih thu dawn a ni.
Minister chuan ram neitute zingah court-a kal pawh an awm tih a sawi a, court thu te pawh nghah a ngai lo thei lo tih a sawi bawk.
“Engpawhnise, sorkar chuan sipai luah ram hi an chhuahsan hunah mipui tana hman a tum a, chu chu sorkar dinna a ni. Chumi tur chuan Mizoram sorkar hian theihtawp a chhuah mek a, a chhuah zel dawn bawk a,” minister chuan a ti.
Sipai luah rama ram neite chungchang ngaihtuah chawp dawn
