Sipai martar-te
hriatrengna ni hmang
India ram hmun dang rualin Thawhlehni zing khan Vijay Diwas (Hnehna Ni) pualin War Memorial Treasury Square-ah chief minister Lalduhoma hoin sipai huaisen, ram tana nun hlantute hriatrengna leh zahna lantirna hman a ni.
Chief minister hian hma hruaiin sipai martarte zahna lantirna atan War Memorial-ah pangpar a dah a, Home minister K Sapdanga, Mizoram Ex Service Leaque president Lt.Col. Clement Lalhmingthanga (Retd) MLA, chief secretary Khilli Ram Meena, DGP Mizoram Sharad Agarwal, Home secretary Vanlalmawia, Padma Shree Hav Lalbiakthanga (World War-II Veterans Association president) leh midangten pangpar an dah a ni.
1971 December 16 khan Ramna Race Course, tuna Suhrawardy Udyan ni ta, Dhaka khawpui Bangladesh-ah India sipai hotu Lt.Gen. Jasgit Singh Aurora kaihhruai allied forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt.Gen. Amir Abdullah Khan Niazi leh a sipai 93000 chu Indo- Pakistan War of 1971 ah India laka tlawmin an inpe a. He hnehna vang hian East Pakistan, tuna Bangladesh tia thlak tak hian Pakistan atangin zalenna a hmuh phah a ni.
He ni hriatrengna atan hian kumtin Vijay Diwas hi India ram hmun tinah leh Bangladesh-ah December 16-ah hman thin a ni.
Sipai martar-te hriatrengna ni hmang
