Sawrkar laipui Ministry of Defence hnuaia National Defence College New Delhi-a National Security & Strategic Course zir mek India sipai officer-te leh India ram thiantha ram dang paruk atanga sipai officer, an vaiin mi 18 chuan Thawhtanni khan Thenzawl an tlawh.
Thenzawl Golf Course hmuna anmahni puala inkawmhonaah he team hruaitu Maj. Gen. Hari B. Pillai sawi danin, National Defence College hi kum 1960-a din niin, tuna he course zir mekte hi a batch 63-na an ni.
National Security and Strategy Course zir tur hian India sipai – Army, Navy leh Air Force atangte leh India thiantha foreign ram sipai, colonel leh a chunglam chinte thlan thin an ni. Heng zirlaite hi India ram chhung fanpui changte, a changin foreign ramah pawh zinpui thin an ni. Tunah hian he course zir mek hi team sarihah inthendarhin India ram hmun hrang hrang an fang mek a; India rama hnam hrang hrangte nunphung leh hnamzia zirin, mipui nunphung hre tura zin an ni.
Thenzawl SDO V Lalmuanpuii’n khualthate lawmna thu sawiin, Serchhip addl DC Lalmuansanga Ralte chuan district dinhmun tlangpui a sawi. SP Stephen Lalrinawma chuan district security dinhmun a sawi a; PTS principal H L Thangzuala, Horticulture College principal Dr Shri Dhar, Thenzawl DFO Lalbiakchama Chawngthu leh AH & Vety atangin Dr Lalmuanpuia Samte ten an hmalakna an hrilh.
National Security & Strategic zir mek ramdang sipai officer-te hi France, Japan, Bangladesh, Bhutan, Uzbekistan leh Oman atanga rawn kalte an ni a. An ni ho leh India sipai officer-te hi National Defence College faculty, senior directing staff (Army-III) Major General Hari B. Pillai hoin an rawn kal a. Nizan khan Thenzawlah an riak a ni.