English Premier League-a manager ropui nia mi tam takin an ngaih Sir Alex Ferguson chuan kum 2012-a a lak luh Rodin van Persie chu United tana khel turin a upa tawh lutuk a, amah chuan lak luh a duh tak tak lo tih a sawi.
Sir Alex hian Arsenal atanga a lak luh Van Persie chungchang hi tunhnaiah a sawichhuak a, a hun lai khan lak a duh tak tak lo tih a sawi. “Kha tihlai khan kum 27 mi a ni tawh a, United tana khel tur chuan a upa mah mah tawh. A kum a tam vang leh A kum a upat tawh bakah hliam a neih theih em vangin vangin lak ka duh lo tih ka staff te pawh ka hrilh. Mah se, phurna thar nei a, chak tha zawka inlan turin tu emaw chu kan lak luh a ngai tih ka hai lo. Traning naah Luka Modric nge in duh Robin van Persie tiin ka zawt a. Player tam zawkin Van Persie an duh zawk thu an sawi a, lak turin hma an la a, ka la lut zui ta a ni. Player tam zawkin lak luh duh mah se kei chuan erawh chuan ka duh tak tak lo. Mah se, kan la lut”, a ti.
Arsenal atanga an hmelma lian Manchester United a zawm lai hi Robin van Persie vul vanglai a ni. 2011-2012 season-ah EPL topscorer a ni a. Gunners tan a chet that em vangin mimal chawimawina PFA Players’ Player of the Year, FA Fans’ Player of the Year, PFA Team of the Year leh
FWA Footballer of the Year chawimawina a dawng hial. EPL team lian Arsenal-ah captain a ni mek bawk. United zawm a chak vangin Arsenal-ah contract thar a ziah loh tur thu a sawi a. Gunners hian ui tak chungin an hmelma lian United hnenah an hralh. United-ah a vul zui viau a, EPL top-scorer a nih zui leh bakah champion a chak em emna Premier League-ah an champion zui ta hial nghe nghe.
United tana a season hma berah che tha viau mah United a la luttu Sir Alex Ferguson chu rin lawk loh takin manager atangin a bang a, United a kalsan. United manager thar Davud Moyes hnuaiah hmun pawimawh a chang tam thei ta lo va, Old Trafford-ah a tlatlum lo telh telh. United inelna hrang hrangah vawi 105 khelin goal 58 a thun hman a, 2015 khan Fenerbahce panin a chhuak.
Sir Alex hian Robin van Persie hi a lak luh dawn laiin iai bawk mah se EPL-ah a champion pui nghal bakah EPL topscorer a ni tel bawk a. Manager ropui Sir Alex hian Van Persie a la lut hi tisual a inti bik lua lo ang.
Sir Alex-a’n Van Persie a duh tak tak lo
