Special Intensive Revision 2026 draft electoral roll enfiah mekah document dik loa roll-a luh tum an awm ngei tih hriatchhuah a ni.Thudawn danin, SIR 2026 neih mekah Chakma tamna hmun lamah document lem hmanga electoral roll hearing-a election official (ERO/AERO) te bum tum man chhuah an awm nual tih sawi a ni a. Heng zingah hian scheduled tribe ni lo, a lema scheduled tribe certificate nei pawh awmin, he certificate siamtu (issue-tu) nia sawia hming tarlan te chhuichianin, document siam lai hian an post chelh nia sawiah hian an awm lohna a rei tawh tih hriatchhuah a ni.
SIR 2026 neih mekah Mizo Zirlai Pawl chuan Mizoram district thenkhata Chakma awmna hlang khua zingah voter zaa za aia tam punna a awm nual avangin rinhlelhawm an tih thu an lo sawi tawh a. Central YMA pawhin Chakma hlang awmna khua thenkhatah SIR 2026 behchhana hman SIR 2005-a vote lo nei tawh, tun SIR-a an pi leh pu/nu leh pa thlah la ni vek khawpa la awm hlang voter pun belh nasa si, rinhlelhawm an awm tih an lo sawi tawh a ni.
Hemi chungchangah hian NGO hrang hrang intelkhawm chuan, India khua leh tui dik tak chauh thunluh an nih theihnan lungrual taka hma lak ho an lo rel thlu tawh a. Mahni huamchhung theuhah Mara Thalai Pawl, Central Young Lai Association, Central Young Chakma Association bakah Central YMA leh NGO dangte nen thawhho relin, hemi ang hian hma pawh an la mek tih thu dawn a ni.
Tunhnaia Lawngtlai district tlawhtu Central YMA hruaitute chuan, rinhlelh an neih an lo sawichhuah tawh chu a dik hmel hle tih an sawi a. Hemi bawhzui hian YMA branch dinna bakah YLA leh YCA nen tha takin an thawkho tih an sawi a ni.
Central YLA chuan SIR 2026 hearing neih mekah hian Lawngtlai district-a Assembly bial pathum – Tuichawng, Lawngtlai West leh Lawngtlai East hmun engemawzat an thutchilh mek tih an lo sawi tawh a. YLA Branch leh Sub Hqrs. YLA chu an huamchhunga hearing neih mekah ngun taka vil turin an lo hriattir tawh tih an sawi a ni.
SIR hearing-ah document diklo manchhuak
