New Delhi-a cham mek minister Lalnghinglova Hmar chuan a department chan kaihhnawihah Ningani khan NITI Aayog member Dr VK Paul chu NITI Aayog Hqrs-ah a kawm a. Thalaite tan Mizorama Skill Training Centre din leh Olympic 2036-a Mizo infiammi tam thei ang ber an tel theih nana hmalak ho dan tur an sawidun.
Sports & Youth Services minister hian Olympic 2036 ah Mizoram atangin infiammi tam thei ang ber tel se an duh a, chumi atan chuan kumin June 13-14 khan Mizoram Sports Conclave buatsaih a ni tih a sawi. Mizoram-in National Games 2032 thlen a duh tih sawiin, sports chu intihhlimna mai ni lo, taksa leh rilru hriselna atana pawimawh leh khawvel hmaa India pholang theitu a ni tih a sawi a ni.
LESDE minister ni bawk hian Mizorama Skill Training Centre lian a awm loh avangin thalaiten harsatna an tawh thu a thlen a. Sawrkar laipuia skill development project-ah Mizoram nena inmil leh Mizo thalaite thiam zawng ‘job role’ siam a pawimawh, tiin, kut themthiam lama an theihna phochhuak a, eizawnna atan an hman theih nan NITI Aayog thawhpui a duh tih a sawi.
NITI Aayog member chuan minister thu thlen chu mimal tak pawha a ngaihpawimawh a ni hlawh tih a lo hrilh a. Ziaka rawtna (proposal) chiang zawk nen, state sawrkar leh NITI Aayog-ten presentation siama kumin September chawhma lamah thutkhawm leh nise, an ti. Minister-in a sawm angin, October thla chhung ngeia Mizorama lo zin a tum thu Dr VK Paul hian a sawi bawk.
NITI Aayog adviser for Northeast Yugal Joshi pawh Lalnghinglova Hmar hian a kawm a. Olympic 2036 inbuatsaihna pakhatah, public private partnership mode-in sports discipline hrang hrangah coaching kalpui tum a nih thu leh Mizorama khua zawng zawng telh tum a nih thu a sawi a. NITI Aayog adviser hian project tha leh hmathlir thui tak a ni, tiin, a hlawhtlin theih nan a lo bawhzui tur thu a sawi
Ningani vek khan minister Lalnghinglova Hmar hian Union Minority Affairs minister Kiren Rijiju a hmu bawk a. A ministry hnuaia project awm thei hrang hrangah sports leh skill development hmasawnna tur project telh ve dan a sawipui.
India ramin Olympic 2036 thlen a tum a, hetah hian Mizoram atangin infiammi tam thei ang ber tel an duh thu leh, chumi atan Mizoramah Sports Conclave buatsaih a nih tawh thu te a hrilh a. Mizoram-in National Games 2032 thlen a duh thu hrilhin, Minority Affairs ministry hnuaia project hrang hrangah sports hmasawnna ruhrel telh ve turin a ngen.
Union minister chuan a ministry hnuaia project-ah Mizorama sports leh skills hmasawnna tur tel thei se a duh tih sawiin, hemi chungchangah hian Mizoram chief minister nen an inkawm tawh tih a lo hrilh a ni.
Skill Training Centre din a nih theih nan NITI Aayog kawm
