Slackline a kal chunga chemte juggle-in record siam

California lam mi, Edgar Yudkevich chuan hrui thlun, su zuk zuk thei zawh chunga chemte luzum pathum juggling-in Guinness World Record a siam.
He slackline hi feet 34.4 a sei a ni a, lei atanga meter khat a sanga thlun a ni a, hetiang hrui thlun hi mar viau mah se zawh zawngin a suk zuk zuk thei a, thildang engmah rilru lapengtu awm lo chung pawha zawh harsa tak a nih tawh laiin Edgar hi chuan chemte luzum, hriam zet mai, man sual palha kut at hlawih thei tur pathum chu a juggling pah char char bawk a ni. Juggling tih chuan chemte pathum chu a kut pahnih hmangin a vawrh kual char char a, engtik lai pawhin chemte pakhat chu boruakah a awm tur a ni a, chemte chu ken reng theih a ni lo va, an vawrh kual char char tur a ni.
Edgar Yudkevich hian slacklining leh juggling chu kum 12 vel zet a lo tuipui tawh a, “He record siam ka tum ni chu World Circus Day a ni a, Coronado, California-ah circus artist pawh an pungkhawm nual a ni. Keipawh circus artist ka nih angin ka inzir nasa hle a, midangin an tihngai vak loh ka entir thin a, mahse, ka him tawk viau chuan ka hria,” a ti.
Guinness World Record a siam hnuah Edgar chyuan, “Ka dam chhunga ka thil tih chak zinga pakhat chu hlenchhuak taah ka inngai. Kum tam tak chhung ka theihnghilh tawh loh tur a ni,” a ti a, a record siam chu amah ngeiin khum leh a tum tur thu sawiin, “Nakinah record dang siam leh ngei ka tum ang,” a ti bawk.