Nimin khan health minister Pi Lalrinpuii chuan Lunglei Electric Venga awm, AH& Vety department hnuaia enkawl ran talhna hmunpui Slaughter House chu a hmunah a tlawh a. He slaughter house hi kum 2013-a bul tan, 2015-a hman theih tura sak zawh tawh ni mah se, tun thlengin hman tangkai theih lovin a awm zui a. Mipuiin tangkai taka he slaughter house an hman theih dan tur hi health minister hovin sawi ho nghal a ni.
Kum sawm panga vel kal taa Aizawl khaw dai (Bung Bangla thlang)a slaughter house sak, a hnua mipui chhawr tangkai theih lohva awm zui ta kha, a hmun a hlat tham ve deuh avangin transportation charge leh eng emaw neuh neuh dang nen, sa man a to phah dawn avangin ran talhtute tan han hman tangkai viau theih kha a ni ta lo a, a hnu lawkah a zuzi a, saruh her dipn atan hman zui a ni a.
A hnuah, tuna Lungleia slaughter house sak hma hreta sak, Mualpuia slaughter house chu Aizawl bazar atangin a hmunhma te a lo hnai zawk a, ran talhtuten an chhawr tangkai ve ta viau a. Mahse thawk khat lai khan, ran talhna hmanrua tuiek ber bur leh maimawm ril bawm khah luk kha chanchinbumiten an tarlang a, a changtu minister leh official-ten press mite hruaiin an tlawh a, chanchinbua hmanraw tuiek tarlan kha a lo tle ver vur ta mai a, kha ta tang khan a nihna tur angin a kal chho zui ve leh a, mahse vawk talhna erawh rei tak hman tangkai zui lohvin a awm.
Sa thianghlim leh hrisel zawk mipuiin an ei theihna tura hmalakna pakhat ran talhna ‘slaughter house’ hi Mizoramin kan hmelhriatna a rei tawh ang huin mipuiin kan la chhawr tangkai tawk lo hle a. Ran talhna hmuna ran talhte hi meat inspector-ten a hrisel leh hrisel loh an endik vek hnua zawrh chhuah tlak chauh zawrh chhuah a ni a. Bazara sa hralhna hmunpuiah meat inspector-ten sa thianghlim ngei a ni tih an nemnghehna certificate chu, sa leitute hmuh theih tura tar chhuah a ni thin.
Hetih lai hian, sa zawrhna hmuna sa lakluh turte hi certificate nei an nih leh nih loh meat inspector-te hian sa zawrhna dawr luhka-ah an lo enfiah zat zat a nih loh chuan, slaughter house-a talh ni lo, khawi lai emaw atanga lo zeh ruk theihna chance a zau em em a, mipui hian sa thianghlim ei anga an inngaih laiin sa thianghlim lo an lo ei ve thei tihna a ni. He hi fimkhur zawka kalpui theih ni se a duhawm hle.
Slaughter house
