Champhai district-a ruihhlo bakah smuggling kawngpui lian tak chu sawrkarin chhutchah tumin hma lak a tum dawn a, tangruala tih chuan hlawhtlin hmuh an inbeisei tih Home minister K Sapdanga chuan a sawi.
Home minister K Sapdanga leh Excise & Narcotics minister Lalnghinglova Hmar te chuan Champhai district-a ruihhlo leh sawrkar dan phal loh thildang tawlhruk awm thin chhutchah a nih theih dan ngaihtuah turin Thawhtanni khan Champhai an pan a, Saitual bawrhsap office leh 2nd IR Bn Headquarters Khawzawl an tlawh chho a ni.
Chief minister-in an sawrkar tih tur hmasa zinga a sawi, ram ralmuanna chungchanga hmalak zel dan enfiah tur an ni a, kan zavaia tangruala he ram hi nuam taka siam an tum dawn a, sawrkar kal tawhten thahnemngai taka hma an lo lak tawhna chhunzawm tumin an inbuatsaih mek tih a sawi.
Champhai chu thil tha rawn chhuahna a nih ang thoin ruihhlo kalkawng a ni a, hengte hi engtin nge ven theih a nih ang tih ngaihtuah a. Ruihhlo bakah smuggling kawngpui lian tak chu chhutchah tumin hma lak an tum dawn a ni. Sawrkar official-te, tlawmngai pawl leh khawthlang mipuiin thahnemngai leh inlungrual taka hna an thawh chuan a hlawhtlinna hmuh theih an inbeisei tih a sawi a ni.
“Ruihhlo laka Mizoram thian thianghlim tur hian, kan tanral chuan do hneh theih a ni. Dan loa sumdawnna dang pawh khuahkhirh a ni dawn a. Kuhva ro chungchangah, ram chhunga tharchhuah ngaipawimawh hmasa in, hralh zawh hunah ram dang ami lakluh chu buaipui theih dan a awm em tih kan ngaihtuah zel ang,” a ti.
Excise & Narcotics minister pawhin, chief minister-in thapui thawhin ruihhlo do a nih tur thu a sawi tawh a, a changtu minister a nih avangin a mawhphurtu ber a nihna chin a awm a, khawtlang hruaitute leh tlawmngai pawl hruaitute tawiawmna an mamawh dawn tih a sawi. “Thapui thawha ruihhlo do turin kan inbuatsaih mek a, sawrkar hi ruihhlo do turin a ban a sei tawk dawn lo. NGO leh mipui thlawpna kan mamawh hle dawn a ni,” a ti.
Smuggling kawngpui lian tak hi chhutchah kan tum dawn – Home minister
