Ni 30 chhung awh tur ‘Training of Social Audit Resource Persons’ chu Nilaini khan SIRD&PR hmun Durtlang Leitanah SIRD&PR director Lalhmunsanga Hnamte chuan a hawng.
SIRD&PR director chuan social audit chu thil thar ni lo mah se, mipuiin sawrkar scheme hmanga hnathawh an endikna atana pawimawh tak Gram Sabha (vantlang rorel inkhawm) kan ngaipawimawh tawk lo thin a, ngaipawimawh zual tura kan inzirtir a tul tih a sawi. Tualchhung atanga hmasawnna hnathawh chu sawrkar laipuiin a ngaipawimawh a, chumi atan chuan mi pawimawh an ni, tih hrilhin, mipuiin sawrkar hmalakna hrang hrang an audit (endik) theih na’na hma latu tur an nih avangin an mawhphurhna a sang a, tihsual leh tih dik loh an neih chuan harsatna thleng thei a nih avangin fimkhur takin, tihsual nei lo tura uluk taka hna an thawh a ngai tih a sawi a ni.
Course director Dr Khuangthansanga Pakhuangte chuan training chhunga hun hman dan tur leh hriat tur pawimawh a sawi a. Centre for Social Audit, NIRDPR Hyderabad training manager Shasidhar leh lead course coordinator Debasis Bera ten thu an sawi bawk.
District hrang hranga social audit resource person-te chu January 25 atanga February 25 thleng mithiamten an zirtir dawn a ni.