Social media-ah ngaihtuahna hruai sual thei thu thehdarh a tam tial tial – Chief minister

Social media-ah ngaihtuahna hruai
sual thei thu thehdarh a tam tial tial
– Chief minister
Social media-ah mite ngaihtuahna hruaisual thei thu thehdarh a tam tial tial a. Thu belhchian dawl lo thehdarh ching, tawngkam bawlhhlawh tak tak hmanga midang umzui ching zingah mi rawntlak leh chinchang hria an vang tih chief minister Lalduhoma chuan a sawi.
Mizoram Journalists’ Association Serchhip District chuan Thawhtanni khan an kum 25 tlin, Silver Jubilee an lawm a. Hmanpuitu, Serchhip bialtu MLA, chief minister chuan thuthar thehdarh lam hna thawktu, a bikin accredited journalist chin chu dawt leh thu belhchian dawl lo thehdarh turah an ngai ngai lo a. An sawi chu an ring mai thin tih a sawi.
Tunah phei chuan social media a chakin a rang tawh a, mitinin a thehdarhna hmanrua kan hum fur a; thu leh hla a darh chum chum a, thu dik leh dik lo hriat hran a har thin hle tih a sawi.
“Mite ngaihtuahna hruaisual thei thu thehdarh a tam tial tial a. Politics lama kan inbeihna tawngkam leh comment tam tak phei chu chhiar hrehawm khawpa mawi lo a tam sawt hle. Hetianga social media lama thu belhchian dawl vak lo thehdarh ching, tawngkam bawlhhlawh tak tak hmanga midang umzui ching hi mi rawntlak leh chinchang hria an vang viau a. Tam tak phei chu mahni hming dik leh hmel tak pawh lantir ngam lo, tlanchhe chunga midang beih ching, mi dawihzep an ni,” a ti.
Social media lamah chutiang chu a tam avangin mipuiin thudik hrilhtu leh kaihruaitu tha an mamawh a. MJA member leh accredited journalist-te chu chutianga thudik puangdarhtu, mipui tana rinawm taka rawngbawltu ni tura ngaih an ni tih a sawi.
Hmanpuitu dang, Home minister K Sapdanga chuan journalism tha lehzual kalpui tura journalist-ten hma an lak a pawimawh tih a sawi a. An hmaa Golden Jubilee lo la thleng tur thlir phaka ke an pen a tul tih a sawi a ni.
Mumal taka kal Serchhipa chanchinbu hmasa ber chu Lenkawl a ni a, kum 1981 khan Remmawia Kawlni chuan a din. Kum 1993-ah Ramlai Arsi a chhuak ve leh a, kum 2000 chhoah a pung ta a ni. Serchhip District Journalist Association an din a, kum 2006-ah Mizoram pum huapa pawl din sa MJA-ah an inchhunglut a ni. Tunah hian MJA Serchhip District-ah member 14 an awm.