Tunlaia hmasawnna thang zelah social media chu tangkai takin YMA pawhin a hman mek rualin, hman fimkhur thiam a tul hle tih MLA Prof F Lalnunmawia chuan a sawi.
June 15 – YMA Day, Thiak leh Phulpui Branch ten an hman a hmanpuinaah Aizawl South III bialtu MLA Prof F Lalnunmawia chuan YMA chu Mizoram chhung leh pawn thlenga Zofate min phuarkhawmtu, mitin huapzo, kohhran leh political party hrang hranga awmte pawh zaikhata kan luanna a ni, tiin, a din chhan angin Kristian nun dan tha ngaisangtu, lusun khawhar hnemtu, hmeithai, pachhia leh tanpui ngaite tanpuitu ni zel se a duh tih a sawi. YMA member-te chu Zonun zemawi tlawmngaihna, aia upate zahna kawngah leh faina kawngah midangte tihhmuhtu ni zel turin a chah bawk.
“Tunlai khawvelah changkanna leh IT hmasawnnain min tuam a, social media hmanga thu leh hla kan inhriat pawh zung zung karah hian YMA member-te social media hman kawngah fimkhur ila, tawngkam mawi leh hriat nuam hmang thin ang u,” a ti.
YMA-in a ngaihpawimawh em em ram leh hnam humhalh, Zofate inpumkhatna leh ruihhlo dote chu sawrkar pawhin a ngaipawimawh hle tih MLA hian a sawi a ni.
YMA Thiak leh Phulpui Branch hian zirlai pass tharte leh mi hmingthate chawimawina hun atan YMA hi an hmang a, ruai nen an lawm a ni.
Social media hman kawngah fimkhur turin YMA-te chah
