A intanna chu phone call mai niiin – lokal ula, lo sun rawh u, tih mai atanga intan a ni.
27 November, 2022 khan China chu apartment-a kangmei chhuak chanchinin a luah khat hneh hle a. Kum thum zet zero-Covid lockdown khirhkhan turu avanga ninna leh hne em emna boruak nen apartment kang chuan thinrimna nasa takin a alhchhuahtir zui a.
Hun rei lo te chhungin Chinese social media leh messaging apps ah te chuan candlelight vigils ti tura inngenna a darh chum chum a, mi sang tam takin an thlawp zui bawk a. Paper blank engmah inziah lohna chu keng langin hruaitute duhlohna leh hnawlna aupui zui niin hriatrengna hun hman chu nasa taka lungawilohna lantirnain a chhuak zui ta a ni.
China-a White Paper protest hi a chhehvel ram bul hnaia thil thleng nen a danglam vak lo. Sri Lanka atanga Thailand thlengin, Asia khawmualpui hmun hrang hrangah lungawilohna lantirin a awm a, a thenah chuan a zuai a, a thenah chuan sorkarin hmehmih tumin hma a la a. Myanmar-ah chuan sorkar dodalna chu kalpui zel niin civil war ah hiala inlet zui a ni.
Tihpalh thila thil thleng a ni lo tiin scholar-te chuan an sawi a, khawvel hmun tina thil thleng niin mass protest chu thil thleng zing tak a ni tawh a, chutihrual chuan a hlawhchham tlangpui an ti bawk.
Heng lungawilohna lantirna atana pawimawh leh sulsutu ber chu technology a ni tlat bawk a.
Carnegie Endowment for International Peace te chuan kum 2017 atang khan anti-government protest chu nasa chho tial tialin kum 2022 kha a vanglai an ti. Nikum khan a hlawhchham nasat kum a ni daih bawk a, mass protest movement avanga policy emaw leadership inthlak danglam tlem ber tum a ni bawk.
Liantham zawka zirchianna neitu Harvard University-a academics te chuan kum 1900 atang khan lungawilohna hrang hrangte an zirchiang reng a. Tun hnai kum sawm hnih chhungin non-violent ‘maximalist’ campaign tih mai sorkar paihthlak tuma hmalakna, sipai sorkar nawrthlak tumna leh sorkar laka helna te chu a pung nasa hle an ti a, chutihrual chiah chuan a hlawhtlinna erawh a beitham hle an ti thung.
Hetianga sorkar lai mek laka lungawilohna nasa taka a punna chhan hi social media hmangtu leh messaging apps hmangtu pun nasat vang an ti.
Tun hma chuan lungawilohna te chu community network kaltlangin kum tam tak inmung tawhin a siam a ni a, chung te chu awlsam taka hmehmih mai harsa em em a ni thung bawk. Tunah erawh connectivity a tha chungchuang tawh a, awlsam takin pungkhawm tura insawm mai theih niin chutihrual chiah chuan hmehmih a awlsam em em thung.
“Hriamhrei hriam tawn ang mai a ni,” tiin Ho-fung Hung, Johns Hopkins University professor, political economy and protest lam specialise na nei chuan a sawi a.
“Mimal ten an lungawilohna an hriat a ngai a, chung mite chu lungawilohna nei dang te nen an inhrilh tawh thin a, lungrualin chet an la thin. Mahse, social media kaltlanga inhuaihawt nghah thuk lutuk chuan thuneitu ten censor emaw surveillance hmangin awlsam takin an chhu chat mai thei thung” tiin a sawi.
Sorkar chuan nasa zawkin surveillance satliah piah lam thlengin ‘digital authoritariasim’ a kalpui nasa tiin Harvard study neihnaa inhnamhnawih tho Professor Erica Chenoweth chuan a sawi a.
Kum 2021-a Myanmar a lungawilohna lantirna neih a nih lai khan thuneitute chuan lungawilote an inbiak pawh theih loh nan internet an titawp hmak a.
Hong Kong leh mainland China ah pawh police te chuan lungawilohna tih tawp nan lungawilote phone leh encryupted messaging apps te chu an enfiahsak bawk a. Chinese activists te chuan social media accounts fake hmangin reporter anga insawiin biak pawh tum thin an ni tiin an sawi bawk a, chu chu thuneitu tena lungawilo te enthlak leh hriatfiah nana an hmanrua pakhat a ni.
Chu lova tactic an kalpuia lungawilote an beihna chu anmahni sawisel leh an movement diklohzia hmang beihlet a ni a. Chumi atan chuan social media bawk chu thudik lo rang taka thehdarh nana hmang niin awmze nei taka troll leh smear campaign hmanga kalpui thin a ni bawk.
Chumi atan chuan thuneitute chuan lungawilote beihlet nan lungawilote zingah ‘foreign forces’ an awm a, chung mite fuihpawrh chu an ni an ti bawk a. Hei hi India thuneitu tena kum 2022 a loneitu lungawilo te beihlet nana an hmanrua hman tlanglawn tak a ni a, Chinese state media-te pawhin an hman rim tak a ni bawk.
Heng bakah hian lungawilote hmehmihna chuan pre-emptie crackdown tih te kalpui niin lungawilote inkarah hem thlak tuma beih a ni bawk a, hei bakah hian Covid pandemic len laia emergency power hman ang te pawh kha lungawilote hmehmih nana hman a ni thin bawk.
Asia ram tam takah democracy a hnungtawlh mek tia sawi a ni a, sorkar te chuan khawvel ram tena an sawisel chungin an thuneihna an sawh nghet tial tial bawk. “Tunah phei chuan authoriatrian leh autocratic regime te chu an inthurual tawh lehnghal a. Nasa zawka chet lain ineternational sanction an tawh pawhin inpuih tawn ni se an ti tawh a ni,” tiin Prof Hung chuan a sawi.
Lungawilohna hlawhtlinna chu tehna dang a awm ang em? Mipui sang tam tak kawtthlera pungkhawm thei tura hip chu hlawhtlinna a ni phawt a, a bik takin authoritarian thuneihna ramah chuan a ni zual bik, tiin Dinau Fu, associated professor of politcial science, University of Toronto chuan a sawi a.
White Paper protest chuan mak tak maiin politics lama harhtharna Chinese khau leh tui tam tak a thlen tlat a, a tum khat nan an nunah sorkar hmalakna ‘no’ an ti ngam ve a ni a ti. Hei bakah hian lungawilohna lantir chuan lungawiloh ngama thalai zawkah a thlen ta bawk, tiin Dr Fu chuan a sawi bawk a. Hei vang tak hian Chinese activists te chuan crackdown a hmehmih mah nise lungawilohna an lantir chu a hlawhtling tawh sa reng reng an tih phah a ni.
“Tute mahin China-ah khatiang khawpa lungawilohna lantir ngamna kha a awm ang tih kan ring pha lo” tiin activists group CitizensDailyCN thupuangtu chuan a sawi a, “A pawimawh ber chu lungawilohna thuk tak nei ten anmahni ang mi tam tak an awm ve tih leh an mal lo a ni tih an hriat phah a ni,” tiin a sawi bawk.
White Paper protest hnuah China hmun hrang hrangah lungawilohna lantirna a pung tih a ni bawk a. Chung te chu White Paper protest awm lo se chuan thleng ngai hauh lo tura ngaih a ni.
Heng lungawilohnate hi a hlawhchham tia sawi theih niin hmehmihin a awm tlangpui a, mahse, nakin zela lungawilohna la kalpui theihna tura chi tuhna tia sawi a ni bawk. People-power chuan dang lamna a siam thei a, hlawhtlinna nasa zawk a thlen thei tih chi a tuh a ni, an ti bawk a.
“Musician ten rimawi an tumho tawh chuan an tum leh hunah tha zawk leh inman zawkin rimawi an tum theih phah thin” tiin Jeff Wasserstrom, University of California Irvine a history professor chuan a sawi a.
Heng ram hrang hranga lungawilohna lantir te hi hmehmih emaw ti mahse a dai mai hauh lo, a hlawhchham tia sawi a nih pawhin template leh script hnutchhiah a nei tho an ti bawk a.
Chung zinga entirna tha tak mai chu The Milk Tea Alliance, Asia rama pro-democracy protester inzawmkhawmte chu an ni a. Kum 2019-a Hong Kong protest a tactic an hman – hand signal, flashmob, umbrella hman leh tear gas dan nan traffic cones hman te chu a hnuah Thailand leh Sri Lanka-a protester ten an hmang zui ve tlat bawk. Authoritarian regime te chuan ram dangte tihsan an thuneihna sawhngheh nana an hmang ang bawkin lungawilohna lantirtute pawhin ram danga an tihdan an hmang ve tho.
China-ah pawh anti-government leh anti-Xi Jinping slogans te aupui vakna chu Bridge Man protest atanga lakchhawn a ni a, a hnuah White Paper protest-ah pawh hman chhunzawm a ni leh bawk a. Henga slogan tam berte hi China ram pawna awm tena an tih nun tang tang niin cencorship-in a pawlh buai ve lohnaah online hmangin an tinung reng a ni, tiin Prof Wasserstorm chuan a sawi.
“White Paper movement chu a tawp tawh a, mahse dodalna boruak chu a la dai hauh lo,” tia sawi a ni a. China ram chhungah pawh lungawilohna boruak chu a nung reng a, eng hunah emaw chuan la irhchhuak thei reng a ni an ti bawk a. Lungawilohna a inlan leh meuh chuan Bridge Man emaw White Paper protest a ni tawh hauh lo thung ang a, symbol thar neiin kalpui a ni ang, an ti bawk
Social Media-in sorkar laka lungawilohna thlen nasa
![](https://theaizawlpost.org/wp-content/uploads/tap_logo-min-large.jpg)