Solar hmanga power siamna hmangtu central leh state sawrkarin a pui mek

Solar hmanga power siamna hmangtu
central leh state sawrkarin a pui mek
Ni zung chakna hman uar deuh deuh a nih theihna’n sawrkar laipui leh Mizoram sawrkar chuan sawrkar ruahmanna hnuaia hetiang hmangtute chu ‘subsidy’ a pe thei a. Power & Electricity department chuan mipuiin he scheme hi chhawr tangkai se an duh tih an sawi.
P&E hotute sawi danin, mahni in atanga ni zung chakna hmanga kawlphetha siamna bun – rooftop solar system hi sawrkar laipuiin kalpuiin, central financial assistance a pe a, ram pumah Phase-I leh II a kalpui tawh. Mizoramah pawh kalpui ve niin, tun thlengin chenna in 431-ah power megawatt 1.9 pechhuak thei bun sak an ni tawh a ni.
Hemi hnu hian sawrkar laipui chuan uar zawka solar system hi kalpui a nih theihnan scheme thar – PMSG:MBY a ruahman a, chenna ina rooftop solar system bun chu a tinzawn niin, he scheme hmangtute chu subsidy a pe a ni.
He scheme atan hian sawrkar chuan a bun theitu, empanelled vendor a nei a, kilowatt 1 -10 inkar bun duh tan an ni hian online hmanga book-in, vendor-te hian an buaipui zui thei a, vendor hi duhthlan theih a ni tih an sawi bawk.
Sawrkar laipui ruahman dan chuan, kilowatt lak tam dan azirin subsidy pek theih hi a tamin a tlem ve a, state sawrkarin a ruahman ve thungah chuan Aizawl Municipal huamchhung leh chumi atanga a hlat dan azir chuan subsidy pek hi a tamin a tlem ve thung.
P&E department chhinchhiah chinah, tun thlengin rooftop solar system bun dan ngaihvena online hmanga inziaklut hi mi 3043 an awm tawh a, bun diltu 611 an awm tawh. Bun fel sak tawh 93 an awm a, heng zinga 75 hian subsidy hi an dawng tawh a ni. Dilna thehluttu tam zawk hian a bunsaktu tur (vendor) an la thlan fel loh vangin, hmasawnna chin a muan phah rih tih sawi a ni.
February 21 khan central leh state subsidy dawngtute hnenah hian Power & Electricy minister F Rodingliana chuan an sum dawn let tur zat hi a hlan a. Rooftop solar system-ah hian Mizoram chu state hma la tha ber pawl a ni tih a sawi a, mipui tam zawkin an hriat belh zel theihnan hriatthiam awlsam zawk tura fakchhuah dan ruahman turin department hotute a chah.
Sawrkar laipuiin ni zung chakna hmanga kawlphetha tam zawk siam a nih theihnan sawrkar pisa hoah pawh bun turin a ruahman a, hemi bawhzuina tur hian Mizoram chief minister hmalakna in cheng vaibelchhe 44 hmuh tur an nei thei dawn nia a lan thu a sawi bawk.