Daily Newspaper

Sonia Gandhi’n Democracy derthawnga siamah Modi puh

8

June 15-a Line of Actual Control (LAC) a Chinese Army te nena intihbuainaa nunna chan ta Colonel Santosh Babu zahna lantirna tha ber chu India sovereignty venhim leh Chinese runna tihtlawlh a ni tiin Congress president Sonia Gandhi chuan a sawi.

Sonia Gandhi thusawi hma hian Prime Minister Narendra Modi chuan Red Fort atanga thusawina a neihah ‘LAC emaw LoC (Line of Control) emaw pawh ni se, ramri bawhchhiat tumtute chu kan sipai ten an chhang let zel ang’ tia sawiin minute 90 Independence Day thuchah a sawiah tlang hrakin China a sawi lang miah lo thung.

Sonia Gandhi chuan Colonel Santosh Babu leh sipai 20 dangte Galwan Valley-a an martar atanga ni 60 a ral tawh thu sawiin zahna a hlan rualin sorkar chu sipai martar te chu an phutawk zahna hlan turin a ngen a. “Heng sipai martar-te zahna kan lantirna tha ber chu India ramri humhim leh Chinese min runna tihtlawlh a ni,” tiin Gandhi chuan a sawi.

Democracy dinhmun derthawngah?
Modi sorkar chu Indian democratic leh Constitutional values kalha che ah puh Sonia Gandhi chuan, “Vawiin hian mitin ten inenfiaha ngaihtuahin, ‘Eng nge zalenna awmzia? Vawiin hian zalen takin kan ziak, tawng, zawhna siam, hnial, mawhpuh thei em?’ tiin a sawi a.

Opposition mawh phurhna nei an nih angin Congress chuan India democratic freedom a awm reng theih nan hma an lak tur thu a sawi a. “India democratic structure chu tun hnai kum 74 chhungin rim takin a awm a, mahse, fiah a nih apiangin a hma aia chakin a awm thei ziah a ni,” tiin Gandhi chuan a sawi bawk a. Mahse, vawiinah hlauhawm takin a awm leh a, a chhan chu sorkar lai berin values leh norms awm sate a mil tlat loh vang a ni. “Tun hi Indian democracy tana hun khirhkhan ber a ni,” tiin a sawi bawk.

Sonia Gandhi chuan India chuan Covid-19 pandemic hnehin economy tlachhia pawh tundin a nih theih ngei a beisei thu a sawi bawk.

Hetihlai hian Communist Party of India-Marxist (CPI-M) general secretary Sitaram Yechury chuan party tena webinar an huaihawtah PM Modi chuan Independence Day puala thuchah a sawiah new India a sawi thu a sawi a.
“He new India hi kan Constitution in India a din hnawlna a ni,” tiin Yechury chuan a sawi a. August 15-ah India chuan zalenna a hmuh laiin ‘August 5 ah Constitution values beihna kan hmu’ tia sawiin hei hi Kahsmir special status tihtawpa Article 370 amend leh Ram temple lungphum Ayodhya a phuma PM Modi tel chungchang a sawina a ni.

Communist Party of India’s (CPI) general secretary D. Raja pawhin PM Modi thusawi chu ‘vaupung leh dawta thutiama’ a khah thu a sawi a.
“India intodelh a sawi a, a policy erawh chu mi kalh chu a ni. Prime Minister leh a sorkar chuan awmze nei takin public sector unit tin te an privatise zel a. A nihna takah chuan Modi hi ram rohlu privatise vektu tia hriat a ni ang,” tiin Raja chuan a sawi bawk.

Rahul Gandhi-a’n Modi dawihzep ti
PM Modi nataka beiin Congress president hlui Rahul Gandhi chuan tute pawhin Army te thiltih theihna kan hai lo, mahse, Modi ‘dawihzepna avangin China-in kan ram an la’ tiin a sawi.
“Tute pawhin Indian army theihna leh huaisenna kan hre vek. PM chauhin a hre lo, a dawihzepna avangin China-in kan ram an la,” tiin a sawi.

Congress hruaitu thusawi hi party-in a India China ramri inbakaihnaaa Prime Minister chu mawhphurtua an puhna kal zel a ni.

Naga peace agreement
Congress chief spokesperson Randeep Surjewala pawhin Naga hel te nena sorkar inremna chungchangah zawhna a neih thu a sawi a.

Hei hi kar kaltaa National Socialist Council of Nagaland-IM leader T. Muivah an ‘Naga leh India chu inremin an awm ang a, mahse India-ah a intulut ngai lovang’ tia a sawi vang a ni.

Naga rebel group te hian kum 2015 khan Modi sorkar nen framework agreement an ziak a, mahse, a kimchanga inremna ziah chu mipui hriatah pholan a la ni lo a ni.

“PM Modi an chhuang taka kum 2015-a Naga Agreement a ziah khan min barakhaih! PM Modi hian ‘Sovereignty intawm’ a remti reng reng em ni? Prime Minister Modi hian ‘Greater Nagalim’ a pawm reng reng em ni? Prime Minister hian ‘flag leh constitution hrang’ a pawm reng reng em ni? Prime Minister hian ram pum dawt min hrilh em ni le?” tiin Surjewala chuan zawhna a siam bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy