All India Congress Committee hotu Sonia Gandhi-i’n inthlan thuchah a siam chu Nilaini khan Aizawla Congress Bhavan-ah AICC hotu Prof. PJ Kurian chuan a tlangzarh.
Sonia Gandhi hian Mizo mipuite duhsakna a hlan a. 1986 June 30-a Mizoram an rawn tlawha Mizo mipuiin an lo lawm danah lawmthu a sawi thar. Kuminah a fapa Rahul Gandhi rawn kal an lo lawm danah Mizo mipui hnenah lawmthu a sawi bawk. Mizoramah BJP thawhpui ve ngai lo tur Congress party vote vek turin mipui a sawm a. India ramah sakhaw zalenna a awm leh ngei theihna’n BJP leh a thawhpuite chu Mizoramah leh India ramah vote loh ngam an ngai, tiin, Mizo mipui, Kristian tha takte tan Congress party a ding reng dawn tih a sawi a ni.
He thuchah tlangzarhtu Prof. PJ Kurian chuan BJP a hlauhawm tih sawiin, ‘One Nation, One Culture,’ ‘One Nation, One Religion,’ One Nation, One Language,’ kalpui an tum nasa tih a sawi. “Heng hi hnam tlem zawk leh a bikin Kristian tan chuan a pawi em em a. Congress party chuan kan do tlat dawn. Mizoram mai ni lo India ram pumah sakhaw zalenna a awm theihna’n theihtawp kan chhuah zel dawn a ni,” a ti.
Sakhaw zalenna chauh chu Congress party ngaihpawimawh a ni lo, tiin, kan nunphung (social life) an ngai pawimawh hle a. BJP-in Parliament-a MP zawng zawng hnena an sem India Constitution Preamble-a secular leh socialist an paih chu Mizo Kristian tan a pawi em em tih a sawi. “Hei avang ringawt pawh hian Mizoram leh India ramah Congress party a sawrkar a ngai,” a ti.
Prof. PJ Kurian hi kum 2012-2018 chhunga Rajya Sabha deputy chairman niin, 1991-1996 chhung Union minister a ni.
Sonia inthlan thuchah tichhuak
