Lungawi lova ni hnih an nawrh hnuah chief minister nen an inbia a, sorkar hnathawkte intelkhawmna Federation of Mizoram Government Employees & Workers (FMGE&W) chuan Thawhlehni hian an kal zel dan tur rel an tum.Kar hmasa Ningani leh Zirtawpni khan badge dum belin lungawi lohna an lo lantir tawh a, Thawhtanni khan chief minister nen inbiain, sorkar thu leh hlate chu Thawhlehni-ah zau zawka an lo sawiho tur thuin an chhang tih thu dawn a ni.
FMGE&W hruaitute hnen atanga thu dawn danin, chief minister hian sorkar sum harsatna lo sawiin, sorkar sum dinhmun hrethiam turin a lo ngen a, anni lamin zau zawka an lo sawiho tur thuin an chhang a ni.
Thawhlehni hian an pawla tel affiliated association hrang hrang aiawhte nen chief minister ngenna chungchang hi ngaihtuah an tum a ni.
FMGE&W hian DA tihpun an dil thin a, dan anga DA lak ve an duh thu sorkarah an lo thlen tawh thin. Chu chu tuna badge dum an bel chhan ber hi a ni.
An hruaitute sawi danin, DA hi sorkar laipui hnathawkte lak zat la ve tur an ni a, tunah hian sorkar laipui hnuaia thawkte lak zat hi 10%-in an pha lo tawh.
Sorkar laipuiah chuan DA hi thla ruk danah, January ni 1 leh July ni 1-ah a pung thin a, 10%-a an phak loh hnuah kuminah July ni 1-ah a pung leh a, order erawh a la chhuak lo a, chumi chhut tel chuan 10% chuangin an pha lo tawh, an hruaitute chuan an ti. Danah chuan sorkar laipui hnuaia thawkte lak ang zat zel hi la tura tih an ni tih an sawi.
FMGE&W hruaitute chuan chief minister an hmuh theih loh reng thu an sawi a, July ni 5 leh ni 27-ah dilna an thehlut a, chumi hma leh August-ah pawh an dil leh a, mahse chief minister hmuh an dilna hi chhang lovin, a reh vang vang zel tih an sawi.
A hun taka hlawh lak an lo dil thin tawh chungchangah, a hun takah hlawh hi la thei rih lo mah se tlai lutukah an la tawh lo a, ni 1-ah la lo mah se ni 5-ah te, ni 6-ah te, ni 10 bawrah te an la thin a, chuvangin ni 1-a lak kher hi an ngiat rih lo tih an sawi.
Sorkar hnathawk lungawi lote’n an kal zel dan tur rel dawn
