Daily Newspaper

Sorkar Laipui Minister Pu Shekhawat-a’n Pu Zorama a Hau

18

Central-a tui lam buaipuitu Jal Shakti minister, Pu Shekhawat-a’n “Mimal takin min rawn phone a. Hei, in project kha ka hmu a, tam deuh ka rawn pe dawn che u nia,” a tih a, “A rawn sawi amount a kha a tam lutuk a, ka ringhlel” tih thu Pu Zorama’n House-ah kumin (2020) February 25-a a sawi laia a hnunga a Minister thenkhat hlim taka an lo nuih hak hak atang khan, engtiang chiaha tam nge chu sum chu, tih rilruah a awm reng a. Amaherawhchu, hun a lo kal zel a, Covid-19-in min tibuai a. Local Task Force te nge thu nei zawk sorkar? tih pawh hre lo tehnuaia kan kal chhoh lai chuan Pu Zorama’n House-a a “rinhlelh” “sum tam deuh” khan khaw êng a lo hmu reng mai hi a lo ni a. Sum “tam deuh ka pe dawn che u nia” titu khan June 23 khan Pu Zorama chu lehkha a rawn thawn hlauh mai a. A lehkhathawna thu ziah te chu chhiar kilh kelh lo mah ila, Press Information Bureau (PIB)-in June 23 a Press Release a siamah chiang taka a lan vek tho avangin inthlahrung lo takin han sawi ta ila. PIB report atanga a lan dan chuan Pu Zorama hian hna a thawk tha tawk lo em maw ni chu aw, tih theih turin Minister Shekhawat-a chuan, JJM-ah Mizoramin hna an thawh muan thu a rawn sawi a, [Jal Jeevan Mission (JJM) chu mirethei te chawikanna lam thil a ni a, In tin tana tui connection pek te hi a thawh pawimawh tak a ni]. Chutihrualin thawk chak turin a rawn nawr bawk a. Kan fiah deuh nan Union Minister Shekhawat-a’n Pu Zorama lehkha a rawn thawn chu, a sawi tum hmaih si loin, a tawi thei ang berin, bung deuh hlekin sawi kan tum dawn a nih chuan heti hian kan sawi ang: ‘JJM (mirethei tanpuina lam) hnuaiah hna in thawk muang lutuk. Campaign ang maia tangin thawk rawh u. Nikumah vaibelchhe 68 pek in ni tawh a. Vaibelchhe 31 in hmang bang a. Kumin atan vaibelchhe 79 pek in ni leh a, in hman ban vaibelchhe 31 nen belhin vaibelchhe 110 in nei ta a. In tum ve tur nen belhin kumin atan vaibelchhe 122 in nei ta a nih hi. |ang ta che u. In tin hnena tui connection Functional Household Tap Connection (FHTC) pek hi Mizoramah December 2022-ah chuan zâah zâ tihthlawhtlin ka tum a ni’, a rawn ti a ni deuh ber. Kawng dangin tlar khat leka kan sawi dawn a nih chuan, ‘Union Minister Shekhawat-a’n kan CM duh em em Pu Zoramthanga a hau’, kan ti thei ang. Chutia Union Minister Shekhawat-a’n chiang taka a rawn sawi takah chuan a tir atanga ka rilrua zawhna awm, Pu Zorama’n House-a “sum tam deuh” “a tam lutuk a ka ringhlel” a tih kha ka hre ta a. Vaibelchhe 79 a lo ni reng mai a. Awihawm lo khawpa tam chu a nih loh hi maw le!, ‘tinge Pu Zorama khan “a tam lutuka ka ringhlel” a tih kher le, ka ti a. A chhan erawh ka hre tawh lo. Ama’n a hria ang, zawt mai rawh u. Ka hriat chu, thil a sawi uar thei hle, tih a ni mai. Chumai bakah chuan December 2022-a mirethei tui connection neihtir hman vek turin zâah zâ a thlawp tur thu leh chutiang a hlawhtlin theihna tura Video Conferencing hmanga meeting neih pui thuai tura Minister Shekhawat-a’n Pu Zorama a rawn hrilh leh, retheite tanpui tura thawk chak lehzual tura a rawn hrilh atang hian, Mizo hming zawng zawnga hming nationalist ber putu kan Chief Minister, Pu Zoramthanga ai chuan vaipa, ahring ahrâna a hmel pawh kan la hmuh loh hian Mizoram hi a hmangaih daih zawkin ka hre ta a ni.

  • Lalremsanga, Mission Veng

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy