Daily Newspaper

Sorkar laipuiah beisei sang

30

Aizawl, December 7: Chief minister Zoramthanga chuan Mizoramin hrileng vanga sum leh pai lama harsatna a tawh mek chungchangah sorkar laipui a beisei san thu a sawi a, Mizoram sorkarin sum leh paia harsatna a tawhah sorkar laipui lamin min tundin an tum khawp mai, a ti.

Inrinni-a New Delhi atanga rawn haw, chief minister Zoramthanga hian Thawhtanni khan thuthar lakhawmtute a kawm a, New Delhi-a a zin chhungin sorkar laipuia mi pawimawh tam tak a hmuh thu leh beisei a neih san thu a sawi.

Hrileng avanga Mizoramin central atanga sum a hmuh tur ang a hmuh loh avanga sum leh paiah harsatna a tawh chungchangte sorkar laipui hotute hnenah a hrilh thu a sawi a, kan harsatna te hi an hria, financial-a harsatna kan tawhah sorkar laipuiin min tundin an tum khawp mai, a ti a, ram pumah sorkar laipuiin GST a hmu tha chho tih a sawi a, chhiah hi a percentage-a state te sem thin a nih angin chhiah hmuh that a nih chuan Mizoram pawhin sum a dawn that chhoh a beisei tih a sawi. Sorkar kum thar atangin SEDP a takin kalpui an tum tih a sawi bawk.

Mizoram tana All India Service Cadre hrang siamsak tura a ngen tawh pawh tih hlawhtlin sak an tum thu a lo hrilh niin a sawi.

“Prime minister hmasa atangin Mizoram tan All India Service Cadre in nei ang an ti a, a ball hi nam luh lohin a awm mai zel a, nangmah ngei hian ball hi nam lum rawh tiin nasa takin ka nawr,” a ti.

MNF sorkar, tun ministry chhung ngeiin Aizawl khawpui chhung atangin Assam Rifles te an insawn chhuak dawn niin a sawi bawk.

Chief Minister hian Prime Minister hnenah Mizoram tana All India Service Cadre hrang siam thu a thlen bakah, Chief Secretary Mizo tawng thiam ruat thu te, Bamboo Link Road thu te, Returnee te insak tanpuina thu te, Myanmar raltlan tanpuina tur te leh Myanmar, Bangladesh leh North East Politics boruak thute a sawipui tih a sawi. Prime Minister chuan a theih ang angin a lo enzuipui tur thu leh tihsak a tum tur thuin a lo chhang niin a sawi.

Union Finance Minister Nirmala Sitharaman a hmuh thu a sawi a, Mizo-ramin sum lama harsatna a tawh chungchangah theihtawpa lo puih a tum thu leh Bamboo Link Road pawh a bultanna atan cheng vaibelchhe 100 man DPR siam phawt turin a lo ti tih a sawi.

Union UD&PA Minister Hardeep Singh Puri a hmuh thu pawh a sawi a, Vaivakawn, Bawngkawn leh Chaltlang Bus Terminal atan Principle Approval leh Feasibility Report te pawm tawh a nih avangin DPR buatsaih nghalna tur pawisa an rawn sanction nghal tur thu a lo hrilh niin a sawi.

Central Minister dang Pu G. Kishan Reddy (DoNER) te, Pu Jitender Singh te bakah NSA Pu Ajit Doval te, Secretary pawimawh zual Home Secretary, Foreign Secretary, Finance Secretary leh CBI Director te kawmin thil pawimawh tam tak a sawipui tih a sawi bawk.

Assam Chief Minister nena an inkawm thu leh Union Home minister nen an pathuma an inkawm thu a sawi a, Chief minister te pahnih inbiak leh state sorkar aiawhte inbiakte an thu dah a nih thute a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy