Daily Newspaper

Sorkar lakah Congress party lungawi lo nasa hle

12

Congress te chuan sorkar chu Lok Sabha-ah Ladakh-a China nena inepna sawiho ngam lovah leh eng vanga House chhunga Prime Minister Narendra Modi chu awm lo nge a nih tiin zawhna an siam.

Defence Minister Rajnath Singh-a’n China nena eastern Ladakh a ramria inepna chungchang a sawifiah hnuah member te thusawi phalsak ve an nih loh avangin Congress te chu chhuak tauin Parliament House complex a Mahatma Gandhi lim hmaah lungawilohna an lantir a ni.

Lok Sabha-a sawifiahnaa a neihah Defence Minister Singh chuan India-in Ladakh ah ‘chona’ a hmachhawn ngei thu sawiin chutih rual chuan kan armed forces te chuan chona awm apiang hmachhawnin ram tan ropui takin an che thin a ni, a ti a.

India chuan eastern Ladakh-ah ramria a ngaih chu a humhim tlat tur thu sawiin Beijing hnenah chiang takin duh dan ang ngawta Line of Actual Control a status quo thlak a remtih loh thu a hrilh tiin a sawi bawk.

“He house zahawm tak hnenah hian Ladakh-ah chona an hmachhawn tia sawi ka hre lo va, House pawh armed forces te hmun sang ber leh bumro taka kan ram venghimtute kan thlawpzia lantira resolution pass turin ka ngen a ni,” tiin Singh chuan a sawi.

Lok Sabha-a Congress leader Adhir Ranjan Chowdhury chuan an party chuan Lok Sabha ah armed forces te huaisenna chungchang faka sawi an duh thu sawiin mahse phalsak an nih loh thu a sawi a.

“Congress party tan chuan ram hi a chungnung ber a, kan sipaite huaisenna kan chhuang takzet a ni. Kan sipaite huaisenna sawi lan kan duh a, mahse minute khat pawh pek kan ni lo, kan tawng phalsak kan ni lo. Zawhna tam tak a awm a, mahse, he sorkar hian a chhang duh lo a ni,” tiin a sawi.

Kum 1962-a China nena indo chungchang sawiin Chowdhury chuan BJP leader hlui Atal Bihari Bajpayee kha chuan parliament a sawiho a thlang a, chutiang bawkin prime minister hlui Jawaharlal Nehru pawhin Parliament session kovin sawihona neih a ni, a ti bawk.

“Tradition kan neihsa te kalpui zel kan duh a, mahse, he sorkar hi chuan China chungchang Parliament-ah sawiho a duh lo tih kan hria a ni,” tiin a sawi bawk.

Congress chief spokesperson Randeep Surjewala chuan ram pum chu Indian army te lakah an lawm thu sawiin ‘Ramri-ah Chinese te hmachhawna kan sipaite an din avangin kan him a ni’ a ti a.

“Mahse, khawnge prime minister? Eng vangin nge prime minister hi Parliament-ah political leadership hlawhchham pawm ngam lova a tlanbo? China hian Indian territory a la em? Depsang phaizawl, Pangong Tso Lake, Lipu Lake leh Y-Junction, China bawhchhiat luih awm reng reng em?” tiin zawhna a siam bawk a.

Surjewala chuan China-in kilometre engzah nge India ram an luah leh eng hunah nge Prime Minister Modi-a’n Indian territory atanga Chinese te a umchhuah dawn tiin zawhna a siam bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy