School Education department-in high school leh higher secondary school exam hun tur an puang a, awmzia erawh a nei thui lo. January ni 31-a education department thuchhuakah chuan high school leh higher secondary school Third Term Exam hi February ni 17 atanga ni 28 chhunga neih tur tih a ni a, hei hi pawl 9 leh pawl 11 tihna a ni. February thla tir lamah khan sikul engemaw zatah pawl 9 leh pawl 11 hi an exam zo tawh, he thuchhuak awm hmaa lo exam tawh pawh an awm.
Tun hnaiah zirna lamah thil tihdanglam a awm nual a, HSLC leh HSSLC exam hun tur, February ni 12-a tan tura tih pawh February ni 5-a practical exam-a tan tura sawt thut a ni. Hei vang hian pawl 9 leh pawl 11 hi sikul engemaw zatah chuan an exam hma a ngai ta a, chuti chung chuan sorkarin February ni 17-a tan turin a ti bawk si tih thu dawn a ni.
Calendar-ah chuan HSLC exam hi March thla chhunga neih tur tih a ni a, mahse February ni 12-a tan tura tih a ni tho. February ni 12 hi VC leh Local Council inthlan vote thlak ni tur a ni a, exam pawh February ni 5-a tan tura sawn hma a ni ta a ni.
HSLC-ah chuan practical exam an zo tawh a, February ni 12 awmna chawlhkarah exam a awm ta lo, ni 19-ah theory exam Mizo subject-in an tan ang.
Nu leh pate sawi danin, pawl 9 leh pawl 11 an exam hma a, kum tharah sikul an lut chauh a, an exam nghal a ni ber. Thla hnih vel lai an chawl dawn tihna a ni.
Sikul thenkhat chuan exam hi an zawhna rei tawh mah se result chhuah hun tur an pawt fan a, February ni 18 vela result tichhuak chauh tur te pawh an awm.
HSLC leh HSSLC exam sawn hma a nih hian pawl 9 leh pawl 11 hi an exam hma a ngai a, sikul engemaw zat an exam hnuah, HSLC leh HSSLC exam nen a insu buai thei tih a chiang chungin sorkarin exam hun tur a ruat leh hnuhnawh a ni.
Sorkar thuchhuakin awmzia a nei thui lo
