May 28 a Parliamentary building thar hawn tur boycott an tum chu thulh tura ngenin Opposition party 10 te hnenah ngenna siamin Parliamentary Affairs Minister Pralhad Joshi chuan he hun chhinchhiahtlaka tel ve ngei turin a ngen a.
Media mi te hmaah Joshi chuan, “Hun chhinchhiahtlak a nih tur thu hrilh ka duh a. Tun hi politics kalpuina hun a ni lo. He thila harsatna siama boycott tum hi a vanduaithlak a ni. An thutlukna ngaihtuah nawn leh turin ka ngen a ni” tiin a sawi.
Ceremony neih tur kimchang sawi bawkin Home Minister Amit Shah chuan Opposition te chu sawm an nih thu sawiin ‘an finna hmangin’ thutlukna an siam ang chu tiin a sawi bawk.
Head of State kalkan
Opposition tena an duhloh ber chu India Head of State President Draupadi Murmu hnawla head of government zawk Prime Minister hawn tir tum chu a ni.
Hei hi chhang letin Assam Chief Minister Himanta Biswa Sarma chuan tun hnai kum kaw chhungin non-BJP State government panga te chuan an State theuha legislative building Assembly building lungphum an phum a ti a, an vaiin Sate Chief Minister theuh te emaw State a rorel lai party president theuh ten lungphum hi an phum a ni a ti a. State pakhatmah constitutional post luahtu State Governor ten hawnna emaw an nei lo a ti bawk.
“Kum 2014 khan UPA Chief Minister te chuan Jharkhand leh Assam ah Assembly building lungphum an phum a, Governor chu sawm a ni lo. Kum 2018 khan Andhra Pradesh Chief Minister chuan Assembly thar tur lungphum a phum bawk a, Governor chu sawm a ni lo bawk. Kum 2020 khan khatih laia Congress president Sonia Gandhi chuan Chhattisgarh Assembly lungphum a phum bawk a, Governor sawm a ni lo bawk. Kum 2023 khan Telangana Assembly chu Chief Minister in hawngin, Governor sawm a ni lo bawk” tiin Sarma chuan a sawi.
‘Constitution bawhchhiatna’
Opposition party te chuan thuchhuah intawm siamin Prime Minister Narendra Modi-an President Droupadi Murmu pawh sawm lova Parliament building thar hawn a tum chu ‘Office sang president office hmuhsitna, Constitution bawhchhiata malmakna a ni’ an ti.
Modi leh Lok Sabha Speaker Om Birla chuan Parliament building thar chu May 28 ah ram tana hlanna an nei dawn a. Sawmna hi physicial leh digital form in House pahnih MP te hnenah sem a ni.
President Droupadi Murmu leh Vice-President Jagdeep Dhankhar te chuan congratulatory message an siam dawn tia sawi a ni bawk a. Prime Minister chuan parliament building lungphum hi December 10, 2020 khan a phum a ni.
Congress ten beizui
Congress te chuan Parliament building hawn tur chungchangah Prime Minister Narendra Modi chu beizuiin ‘mi pakhat invaivung leh intihlar tum’ zel chuan tribal hmeichhe president hmasa berin constitution privilege a neiha building thar a hawn tur a dal tiin an sawi.
Opposition party tangrual 10 te an zinga Congress, Left, TMC, SP leh AAP te pawh telna chuan ‘democracy thlarau hipchhuah a nih laiin’ building thar hawnna neiha tel an tum lo an ti a. A hranpa in AIMIM chief Asaduddin Owaisi pawhin Lok Sabha Speaker Om Birla an Parliament building thar a hawng dawn lo a nih chuan an party in an telpui dawn lo a ti bawk.
Congress general secretary Jairam Ramesh chuan, “nimin lawkah President Draupadi Murmu chuan ram chhunga judicial campus lian ber Jharkhand High Court complex Ranchi ah a hawng a. Mi pakhat invaivung leh mahni intihlar tum chuan Adivasi hmeichhia president hmasa berin Constitutional privilege a neiha New Delhi a May 28-a Parliament building thar a hawn tur chu a dal a ni” tia sawiin, “Ashoka the Great, Akbar the Great, Modi the Inaugurate” tiin Ramesh chuan a sawi zui bawk.
BJP kaihhruai National Democratic Alliance te chuan Opposition boycott chu bei let thungin Opposition te dinna chu ‘kan ram ropui tak democratic ethos leh constitutional values te beihna’ tiin an sawi ve