Daily Newspaper

South China Sea a China chetdan in dan a kalh : US

31

China-in South China Sea-a ram neih tuma chet a lak ngawtna chu ‘dan kalh bur’ tiin US Secretary of State Mike Pompeo chuan a sawi.

Pompeo chuan Beijng in tuipui ram inchuha thuneihna chan tuma a thenawm ram tenau zawk te a vau thin chu a dik loh thu a sawi.

China chuan US chuan ‘tum reng vangin thudik leh international law sawi danglam a tum a ni’ tiin a chhang let thung.

China chuan South China Sea-ah artificial island siamin chutah chuan sipai hmun a din mek a, he a din meka hi Brunei, Malaysia, the Philippines, Taiwan leh Vietnam te pawhin an rama an chhal vek a ni.

South China Sea a thliarkar ang te reuh te te awm fir fer te chu a chhehvela ram ten kum za chuang fe an ram tia an inchuh tawh a ni.

Beijing-in a ram anga a chhal hi ‘nine-dash line’ tih niin a ram a nihzia lantir nan building sain a vil bawk a, sipai hmun a din bawk.

Heng thliarkarte hi mihring tena an luah lem loh niin thliarkar pahnih lian deuh bik chhehvel chu natural resource-a hausa taka ngaih ni thungin, hei bakah hian lawng kawng pawimawh lutuk leh sangha manna hmun pawimawh a ni bawk.

Annual defence review a neihah Japan chuan China-in naval activity a neih reng te chu ngaihmawhawm an ti a, Beijing chu East leh South China Sea-a status quo thlak danglam tumah a puh bawk.

Pompeo an eng nge a sawi?
Pompe chuan Beijing in South China Sea a Spratly Islands a ram anga a chhal chu hnawlin Beijing hian ‘helai bialah a duh ang anga thil a kal pui ngawt a thiang lo’ tiin a sawi.

US chuan ram inchuhah tan bik a neih ngai loh thu sawiin Beijing in Vietnam, Malaysia leh Indonesia tuipui a chhuh ngawt chu a pawm loh thu a sawi bawk a.
“China-in ram dangte vaua sangha manna emaw hydrocarbon development heng tuipuia kalpui a phal lo ngawt emaw chuti lam hawia hma a lakna hi dan kalh a ni,” tiin a sawi a.

“Khawvel chuan Beijing in South China Sea a maritime empire anga a ngaih hi a rem ti lovang,” tiin a sawi bawk.

China-in a chhang let?
Twitter kaltlangin Washington DC a Chinese embassy chuan US state department chuan ‘thudik leh international law, United Nations Convention on the Law of the Sea siam danglam a tum a ni’ a ti ve thung a.

America chuan helai biala thil awm dan alova luakchhuaka sawiin China leh a chehhvel ram te inkarah hem thlak a tum a ni, a ti bawk a. “US puhna hi pawm theih lo a ni a, China chuan a hnawl bur a ni,” a ti bawk.

South China Sea inchuh chhan?
He tuipui hi lawng kawng pawimawh lutuk niin tun hnaiah China leh a chhehvel ram tena buaina an neih phahna ni bawkin China chuan mihring luah loh thliarkar pahnih Paracels leh Spratlys te a ram anga a chhal nat tak vang a ni.
China chuan he territory lian ber chu kum za tam tak kalta tawh atanga an ram a nih thu a sawi a. Helai hmun hi sangha tam em emna leh oil leh gas reserve tam tak awmna nia sawi a ni.

US chuan helai bial hi China chuan sipai hmun buna thunun tumah puhin China ram a nih lohzia lantir nan ‘Freedom of Navigation’ mission kalpui in a indo lawng lian te a tir fo bawk a, hei hian China a tithinur em em bawk.
August 2018 khan South China Sea island a ram inchuh finfiah turin BBC team te chu US military plane-in an thlawk a. An radio kaltlangin pilot chu a rang thei ang bera thlawk sawn nghal tura hriattirna an dawng nghal a ni.

He mi hma lawk hian China chuan a bomber te chu he thliarkarah hian a thlawh luhtir bawk a ni. China-in helai hmun hi a thunun a nih chuan khawvela lawng kawng pawimawh ber a thunun dawna ngaih niin chu chu an duh lo hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy