Daily Newspaper

South Korea a Covid-19 darhna chhan inkhawmna ni ber

6

Covid-19 beihletna kawnga ram fak hlawh em em South Korea chuan ram pum huapa virus inkaidarh hmachhawn thei reng a nih tawh thu official-te chuan an sawi.

Tuna corona virus kai tam leh thutna chhan hi right-wing Presbyterian church atanga irhchhuak niin a tum khat nan South Korea a province 17 ah a darhchhuak tawh a ni.

Nitin virus kai thar digit thum an tling ziah a, social distancing rules nasa zawka kalpui niin Seoul khawpuiah chuan hmaikawr vuah chu tihmakmawh niin sorkar pawhin school leh sum dawnna khar tur a ni em tih a ngaihtuah mek bawk.

Infectious diseases expert te chuan sorkar chu social distancing measures nasa zawka kalpui tura ngenin ‘hospital khum a khat chak lutuk a, medical system-in a zo lo thuai dawn’ tiin an sawi bawk.

Korea Centers for Disease Control and Prevention (KCDC) chuan virus kai zinga 20% te chuan an kaina an hre lo tia sawiin contact tracing system tha lutuk kalpui a ni chungin hriat a ni chuang tlat lo.

South Korea in Covid-19 a do hi kumin February thla atang khan Daegu khawpuia Kristian kalsual pawl Shincheonji Church of Jesus atanga virus inkaidarh atanga intan niin hmalakna chak tak vangin an thunun thei zui mai a. Mahse, tunah erawh thil a danglam ta em em thung a ni.

Inrinlohna leh phiarrukna
Tuna virus kai hluarna te hi khawpui lian mipui bitna mi maktaduai 10 vel chenna a ni deuh vek a.

A pawi lehna bawk chu far-right worshippers a thehdarhtute ber ber hian virus chu sakhaw biakna an kalpui theih loh nana phiarrukna (conspiracy) ah an ngai tlat bawk. Hei vang hian contact tracing tih pawhin an duh lo va, test phei chu an duh lo zual bawk.

Hei bakah hian hlauhthawnawm tak awm bawkin Shincheonji church a virus kai tam ber te kha thalai kum 20 chho vel an ni a. Tuna inkaichhawn mekah erawh a kai te hi kum upa lam an ni ta thung.

Sarng Jeil Church hi “Hmangaihna a hmasa ber” tia leh theih niin right-wing conservative te an ni a, President Moon Jae-in hi communist a ni a, China leh North Korea uite a ni tia ngaitute an ni.

Coronavirus len hma pawh khan Seoul a an Centre-ah tam tam tak taka punkhawmna neiin South Korean leader Moon Jae-in duhlohna lantirin Blue House paltlangin ring tak taka auin kawng an zawh thin.

He kohhran pastor pakhat Lee Hae-suk chuan kar kalta khan Covid-19 a kai hnuah ‘virus kai an tam zel chu Sarang Jeil Church tihchhiat tumna’ tia sawiin, phiarrukna a tia, phiarrutu chu ‘Moon Jae-in’ tiin a sawi bawk.

Hei bakah hian he kohhran hian kar kaltaa press conference an neihnaah pro-North Korean sympathisers ten Biak In lutin virus an thehdarh an ti bawk.

He kohhran member 875 te hian Covid-19 an kai tawh a, health officials te chuan hei aia tam daih hi kai an awm tawh ringin a darh nasat an ring tawh bawk.

Kohhran member te hian 15 August khan Seoul khawpui lailiah kawng zawhna lian tak neiin mi sing chuang pungkhawmin a tam ber te chu kum 50 chunglam te an ni a. He rally neih hnu hian mi 200 chuang positive an awm tawh a.

Sorkar chuan rally a tel member te hming kohhran a dil a, kohhran in a pek duh loh avangin kar kalta Zirtawpni zan khan police te chuan an dap zui a, kohhran headquarter luhchhuahin member list an la chhuak ta a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy