South Sudan-a passenger phur thlawhtheihna tê chi tlaah a chuang mi 14 an thi vek niin an ram civil aviation authority (SSCAA) chuan a sawi.
Thuneitute chuan a tlakna hmunah hian chhui tur team an tir a, report hmasaah erawh chuan ‘khaw awm dan uchuak tak, a bikin khaw hmuh theih chin tawi lutuk vanga’ a tla a ni thei tih SSCAA chuan thu a chhuah.
Thlawhna hi Thawhtanni zing khan an khawpui, Juba chhim thlang km 20 vela hlaah a tla a. Yei atangin zing dar 09:15 (India-a chhun dar 12:45)-ah a thlawk chhuak a, minute 30 vel hnuah a biakpawh theih loh zui a ni.
A chuang mi 14 hi a khalhtu leh passenger 13 an ni a, South Sudanese 12 leh Kenyan pahnih an ni.
Cessna 208 Caravan hi CityLink Aviation Ltd.-in an enkawl a ni.
Khawvela ram naupang ber, South Sudan-ah hian inkalpawhnain hma a la sawn lo hle a, an aviation industry hi a him lo hle.
Kum 2011-a zalenna an hmuh hnu kum sawm chhung khan ram chhungah thlawhna 55 chuang a tla a, mi tam tak an thi a ni.
Chetsualna tam tak hi thlawhna hlui leh enkawl uluk oh vang a ni a. Chuang tam lutuk, khaw awm danin a zir loh leh a khalhtu tihsual pawh mawhpuh thin a ni.
January, 2025 thla khan Juba pana thlawk chu a thlawh chhuah atanga minute thum lekah hmar lama Unity state-a tuialhthei laih chhuahna hmun bulah a tla thla a, hnathawktu 20 an thi.
Thlawhna chesual na ber chu November, 2015 khan thlengin Juba tumhmun bula Antonov chesualah mi 41 an thi.
South Sudan-a thlawhna tlaah a chuang 14 thi vek
