South Sudan damdawi in leh bazar bomb-naah mi pasarih thi

South Sudan damdawi in leh
bazar bomb-naah mi pasarih thi
South Sudan-a damdawi in leh bazar-a bomb tihpuahah mi pasarih vel an thi niin damdawia mi puitu pawlin an sawi a, tual chhung indona a len leh hlauhthawnna a lian hle.
Doctors Without Borders (MSF) chuan helicopter hmangin Old Fangak, Jonglei state-a damdawi inah bomb thlak a nih thu leh a kan chhiat vek thu an sawi a. A hnu darkar chanve velah khua kah leh a ni tih an sawi bawk a. Tual chhung bazar-ah bomb tihpuah a ni bawk tih an sawi.
Inrinnia beih damdawi in hi mi 1,10,000 chuang chenna, Fangak county-a a awm chhun an ni a, damdawi leh hmanrua an dahte pawh a chhe vek tih MSF chuan a sawi.
Tanpuitu pawl hian mi 20 hliam tuar an awm thu sawiin ‘khawvela mihring inlainatna dan’ palzutna dik tak a nih thu an sawi.
MSF thupuangtu, Mamman Mustapha-a chuan a titu leh a chhan an la chhui mek thu a sawi a, hetih lai hian tual chhung mi thenkhat chuan ‘sorkar sipai helicopter’ a nih thu an saiw.
“Damdawi inah hian chiang takin kan logo nen ‘damdawi in’ a ni tih tar lan a ni,” a ti a. “Khawi lam ve ve hnenah pawh damdawi in a awm thu kan hrilh vek a ni,” a ti bawk.
South Sudan sorkar chuan engmah a la sawi ve lo.
Tun hnaiah South Sudan-a UN hotu, Nicholas Haysom-a chuan an ramah ‘tual chhung indo a chhuah leh hnaih’ a hlauhawm thu a lo sawi tawh a. President Salva Kiir leh Vice-President Riek Machar inkarah khi nasa tak a awm a ni.
Damdawi in bomb a nih hma lawk hian sipai lal, Paul Majok Nang-a chuan luia bungraw phur lawng tam tak beih a nih avangin phuba an la dawn tih a sawi a. A beitute hi Vice-President Machar lam hnaih hel pawl niin a puh bawk.
Machar-a hi a thuihhruai tam takte nen hel an tum nia puhin March thla khan man a ni.
Tun hnaiah sorkar chuan hel tum ram bial, Machar-a thlawptu nia an hriatte pawh an puang.
South Sudan-a hnam hnih lian tak awmte inkarah khi awmin hei hian buaina lian a hrin mai hlauhna pawh a lian hle a ni.
South Sudan hi kum 2011 khan Sudan atangin a indang a; mahse, kum hnih lek hnuah President Kiir-a’n Machar-a chu sipai chakna hmanga amah paih thlak tuma puhin a bân a, tual chhung indona a chhuak zui.
Indona hi anmahni tantu hnam hnih inkar anga kal zuiin mi 4,00,000 vel thi leh tlanchhia maktaduai 2.5 chuang an awm hman nia chhut a ni.
Kum 2018 khan inremna siamin mi pahnih hi an hruaituah an tang zui a, inthlan pawh huaihawt tura tih reng ni mah se tun thlengin an la inthlang lo.
Kumin kum tir lamah khan tual chhung indo laia Machar-a lama tang, White Army helhovin Upper Nile state-ah sipai beiin Nasir-a sipai hmun an lak a, inepna a thar leh zual.