South Sudan kohhran leh politic hruaituten Isua Thawhleh Ni-ah inremna ngen

South Sudan kohhran leh politic hruaituten Isua Thawhleh Ni-ah inremna ngen
South Sudan-a kohhran hruaitu leh politician-te chuan Isua Thawhleh Ni thuchahah an ramah ‘inremna tluantling’ siama mi thah leh buaina chhuak tihtawp a nih theih nan an ngen.
Ram puma Kristian pawl hrang hrang kohhrana inkhawmte hnenah an sawi a, thenkhat chuan tharum thawhna thleng chu ram hruaitute vang niin an sawi.
UN chuan South Sudan chu tual chhung indona hmunah a kir leh thei dawn tih a lo sawi tawh.
Kar hmasa khan an khawpui, Juba chhimthlang lama Jebel-Iraq-ah silai kengten thil laih chhuahnaa thawk mi 74 an that a. Sorkar leh eptu hotute chuan tu nge mawhphurtu chungchangah an inhnial zui.
Juba-a St Theresa’s Cathedral-a Thawhleh Ni inkhawm hmanpuitu, Santo Loku Pio-a chuan, “Kristiante hian inhuatna an nei lo va, mi emaw thihn thlen thei tharum thawhna an hmang lo va, nunna tichhe thei thil dang an hmang ngai lo,” a ti.
“Hna hlohna tura mi that tura tih i nih pawhin hnawl rawh,” tiin mipuite chu ‘remna neitu rawh u’ a ti bawk.
South Sudan hruaitute hnena thu a chahah Pio-a chuan an rilru leh hmalakna chu thlak turin a ngen.
“Hruaitu tha tak ni rawh u – governor tha, commissioner tha, rawngbawltu tha leh khawtlang rawngbawltu tha tak ni rawh. Tharum thawhna atanga kan din chhuah a hun tawh a, thil dik i ti ang u, remna a lal dawn niin ka hria,” a ti.
President Salva Kiir-a’n Isua Thawhleh Ni pual thuchahah pawh ‘remna, inremna leh inpumkhatna’ a awm theih nan a ngen.
St Theresa Cathedral-a a press secretary aiawha thua sawiah ‘kan hun thim ber lai pawhin beiseina a bo ngai lo’ tih hriat reng hun a nih thu a sawi.
“I ngaidam tawn ang u, inthlawp tawn ang u, kut insuihkhawm ila, a mite chakna leh zahawmna lantir thei ram i din ang u,” a ti.
South Sudan-a Episcopal Church Archbishop leh Anglican Primate, Justin Badi Arama-a chuan Juba-a All Saints Cathedral-a inkhawmte hnenah, “Chhel la, remna nghet tak siam turin thawk rawh,” a ti.
“South Sudan-a tharum thawhna titawp tur leh kan hnam pum huapa mihring zahawmna siam that lehna turin hma kan lak vat a ngai a ni,” a ti.
Chhimthlang lama Yambio khawpuia Catholic Diocese of Tombura-Yambio Bishop Eduardo Hiiboro Kussala-a pawhin remna siam turin a ngen.
South Sudan-ah hian indona a nasat tawh avangin kum 10 pawh la liam lo ang khan tual chhung indonaah a let mai hlauhna a awm.
Kar hmasa khan US Embassy chuan thuchhuah siamin First Vice-President Riek Machar telin eptu politician mante chhuah a phut a, hei hi inthlan hlawhtling neih theihna tur a nih thu leh remna kawng tha tak a nih thu a sawi.
Machar-a hi tunah hian house arrest-in a awm mek a, ram phatsan, indona sual leh mihringte laka dan bawhchhiatna thubuai siamsak a nih avangin thubuai ngaihtuah mek a ni a, a pha thung.
A party, Sudan People’s Liberation Movement/Army In Opposition (SPLM/A-IO) chuan he thubuai hi ‘politic-a phil tumna’ a nih thu leh kum nga chhung tual chhung indona tihtawp tawh, kum 2018-a remna thuthlung siam ‘tihchhiat’ tumna a nih thu an sawi.
South Sudan hi khawvela ram naupang ber a ni a, kum 2011 khan Sudan lakah zalenna a chang a ni.