Beauty salon leh spa lam hmathehin tunhnai khan Mizoram hmeichhia pasarih chu Uttarakhand-ah sawm an ni a, nawhchizawrhna kaihhnawiha luh tir luih niin, he thil hi manchhuah a ni tawh. Mizoram Police hotute hnen atanga thudawn danin, kumin May 1 khan Mizo hmeichhe pakhat hnen atangin All Women Police Station Aizawl chuan FIR a dawng a. FIR-a a ziah danin, amah leh a thiannu chu Beauty Queen Salon & Spa, Rudrapur Uttarakhand-ah thla khata Rs. 20000 hlawha thawhna tur a awm tih hrilh niin, he hmuna thawk tur hian October 2025 khan an kal a. An kalna senso pawh an thawhna tur Spa neitu hnamdang mi in a lo tihfel sak vek a ni.
An hnathawhna tur hmun an thlen hian, hlawh an hmuh theihna tur chuan physiotherapy leh massage services lam zawnga tawktarh siin, mipat hmeichhiatna hawi (extra services) an tih tel ngei ngei a ngai tih hrilh an ni a. Ni khatah dawrtu mi pathum atanga pakua neih luihtir thin an ni a, dawrtu tur an neih dawnin an duh lo chung zu leh ruihlo chi hrang hrang pein hrairuih thin an ni tih a sawi a ni.
Hetianga an hmeichhiatna zawrh luihtir an nih hnu pawh hian an hlawh tura an tiam hi pek an ni ngai loa, ei leh in leh an kalna senso rulhna atan cut sak vek zel niin, thla khatah Rs. 500 chauhte hman tur an pe thin a ni. An hna bansan an tum hian a chhawrtute hian phal loin, an tlan chhuah theih lohna atan tala-in gate-ah an kalh hnan tih sawi a ni.
Amaherawhchu, kumin April 4 zing khan tala hi tuboh leh chheni hmanga chhuchhiain an tlan chhuak a. April 7-ah Aizawl lo thlengin, rawn awmte an inrawn hnu ah FIR hi thehluh a ni ta a ni.
He report zulzui hian All Women Police Statation-ah Immoral Traffic (Prevention) Act 1956 leh Bharatiya Nyaya Sanhita (BNS) 2023 hnuaiah thubuai ziahluh a ni a. Danin a phut angin a chhui turin SDPO Aizawl South ruat a ni. Chak zawka he case hi chhui a nih theihnan Special Investigation Team (SIT) din a ni a. Mizo hmeichhe dang pawh he suahsualna leh inbumnaa la tang mek an awm tih hriat a nih avangin chhanchhuak tur leh thilsual titute chunga dan anga action lak a nih theihnan Mizoram Police Team leh Women & Child Development Department hnuaia thawktute chuan May 4 khan Uttarakhand hi an pan a. May 5 khan Rudrapur Police nen Mizo hmeichhiate thawhna hmun Beauty Queen Salon & Spa hi luhchhuah niin, an luhchhuah lai hian Mizo hmeichhia panga an lo la awm a, an zingah hian kumtling lo pahnih an tel.
Rudrapur Police Station-ah thubuai dang ziahluh niin thilsual titute leh nawhchizawrhnaa inhnamhnawih mi paruk man an ni a. Heng an mi man zingah hian a bultumtu leh Spa neitu ni bawk hnamdang leh a kawppui Mizo hmeichhia bakah a laizawnnu an tel a ni.
He pawikhawihna tuartu Mizo hmeichhia chhanchhuah takte hi Child Welfare Committee Rudrapur kutah hlan an ni tawh a; enkawlna leh counseling pek mek an ni.
Mizoram Police chuan Women and Child Development Department Mizoram nen tangduna heng hmeichhe chhanchhuahte him taka Mizorama hruai haw an nih theihnan hma a lak mek bakah dan anga na taka pawikhawihtute hrem an nih theihnan theihtawp a chhuah zel dawn tih an sawi a ni.
Spa hmathehin Mizo hmeichhia 7 nawhchizawrhna lamah hnuklut
