Spain manager Luis de la Fuente chuan karliamta tawp lam khan kan hma lawk Germany rama European Championship khel tur player 26 a tichiang ta a, rawlthar kum 17 mi lek ni chunga season liamtaa Barcelona tana khel tha lutuk defender Pau Cubarsi bakah midfielder pahnih Marcos Llorente leh Aleix Garcia a thlang ta lo.
Cubarsi kha a khelh that ngheh (consistency) leh tlarhnung atanga ball a chhuahpui theihnate avang khan tun season La Liga-a player hmuhnawmberte zingah a invawrh thei a, mahse, De la Fuente mitah chuan Euro 2024 khel tlak em a lo la ni lo a, centre back rualkhat – Robin Le Normand, Nacho Fernandez, Aymeric Laporte leh Dani Vivian-te lakah rinna a nghat lian zawk a ni.
City manager Pep Guardiola duhsakna dawng pha loa nikuma Saudi Arabia club Al-Nassr zawm ta Manchester City defender hlui Laporte laka head coach-in rinna a nghak zawk khan mi mak tih a hlawh deuh a, kum 30 mi lai ni tawh Laporte ai chuan rawlthar tha za zek zawk, Nou Camp-a langsar em em bawk si Cubarsi ring zawk an kat nuk niin a lang!
Euro 2024 squad-a hmun a chan zawh tak lohah chuan Cubarsi hi Paris-a inkhel tur Spain Olympic team lama a insawrbing zui a ngaih hmel a; Tokyo Games-ah khan final-a chak zo loin silver medal an la a, Paris- ah hian Cubarsi hoin gold medal an beisei tura ngaih a ni.
Karliamta Nilaini friendly match-a singa faia Andorra an sawp tuma goal khat thuna assist vawikhat nei bawk Newcastle United leh Leicester City forward hlui Ayoze Perez khan kum 30 mi ni chungin a international debut-ah khati ang hlawhtlinna kha chang thei mah se Germany pan tur attacker pariat zinga a tel zui ta mai khan mak tih a hlawh v iau a ni.
Nilaini friendly-a a debut nghakchhuak ve dang Barcelona player kum 21-a upa midfielder Fermin Lopez thlan a ni tlat pawh khan mak tih a hlawh a, Andorra game-ah khan assist vawikhat chu a siamchhuak ngei mai a, 2023-24 campaign-a trophy la zo lo Catalan team tan langsar takin khel tluan thei bawk mah se Germany pan tur final squad emah chuan a lan phak an beisei loh zinga mi a ni.
A club team-mate Pedri pawh tihrawl na neuh neuh avangin a talbuai ve fo a, mahse, record siama City kuta Premier League title a zawna vawili chhungluttute zinga mi kha a ni a, Spain midfielder group khawng tak zingah kan hmu chhunzawm dawn a ni.
Nikum UEFA Nations League champion Spain hian Inrinni khan an final warm-up game-ah 5-1 tehrengin Northern Ireland an sawp a; he game-ah hian first half tir lamah Pedri chuan goal hnih khungin, Alvaro Morata leh Fabian Ruiz-te’n chawlhlawk hmain goal khat ve ve an thawh ve leh a, second half tir lamah Mikel Oyarzabal goal lut bawkin, Irish-ho goal neihchhun hi tan atanga minute hnihna leka Daniel Ballard-a tauhluh a ni thung.
He match-ah hian goal khung lo mah se Barcelona forward kum 16 mi Lamine Yamal a langsar leh a, Spain goal hnuhnung pahnih siamchhuaktu a ni.
Spain hian June ni 15, Inrinni hian Euros campaign bul an tanna inkhelah Croatia an su dawn a, Group B match dangah Italy leh Albania an tum zui leh ang.
Spain Euro 2024 squad
Goalkeepers: Unai Simon (Athletic Bilbao), Alex Remiro (Real Sociedad), David Raya (Arsenal)
Defenders: Dani Carvajal (Real Madrid), Jesus Navas (Sevilla), Aymeric Laporte (Al-Nassr), Nacho Fernandez (Real Madrid), Robin Le Normand (Real Sociedad), Dani Vivian (Athletic Bilbao), Alex Grimaldo (Bayer Leverkusen), Marc Cucurella (Chelsea)
Midfielders: Rodrigo (Manchester City), Martin Zubimendi (Real Sociedad), Fabian Ruiz (Paris St Germain), Mikel Merino (Real Sociedad), Pedri (Barcelona), Alex Baena (Villarreal), Fermin Lopez (Barcelona)
Forwards: Alvaro Morata (Atletico Madrid), Joselu (Real Madrid), Dani Olmo (RB Leipzig), Nico Williams (Athletic Bilbao), Mikel Oyarzabal (Real Sociedad), Ayoze Perez (Real Betis), Ferran Torres (Barcelona), Lamine Yamal (Barcelona)