Spain hmun 20-a ram kang thelh turin sipai 500 tirh belh

Spain hmun 20-a ram kang thelh turin sipai 500 tirh belh
Spain-ah kar hmasa tawp lam atanga khaw lum uchuak tak intan karah hmun 20-a ram kang nasa tak thelh hna thawhpui turin military emergency unit-a sipai 500 dang an tirh belh.
“Kan hmaah hun khirh tak tak a inchhawp mek a, vanduaithlak takin khaw awm dan hi kan lamah a tang lo a ni,” tiin Prime Minister Pedro Sanchez-a chuan Pathiannia a tuar na ber zinga mi, an ram hmarthlanga Ourense-a thuthar lakhawmtute a kawmnaah a sawi.
Sipai tirh belh hi puangin ram kang thelha che chhuak sipai hi 1,900 an ni tawh.
Kang thelhtute chuan Galicia region-ah ringawt pawh ram kang lian tak tak 12 a awm mek a, a vai hian Ourense khawpui hnaihah vek a ni tih Galicia region sorkar hotu, Alfonso Rueda chuan a sawi.
“Inte chu dinhmun hlauhawm takah a la ding a, hmun thenkhatah inkharkhip leh inthiar chhuah hna kan thawk,” a ti.
Europe ram hmun dang atangin kang thelh thei thlawhna tirh luh tur thu puan a ni bawk.
Rail operator Renfe chuan Pathianni khan ram kang avang hian Madrid-Galicia high-speed train service an chawl tih an puang bawk.
Galicia-a thuneitute chuan mipuite chu meikhu leh meivap hip tam a hlauhawm avangin hmai tuam tur leh pawn chhuak tam lo turin an chah.
Europe chhim lamten kum 20 chhunga ram kang an tawrh nat ber thleng mekin Spain hi a tuar ber zingah a tel.
Kar hmasaah khan ram kang vangin mi pathum thiin sq km 1,150 chuanga zau a kang chhia a. An thenawm, Portugal pawh an buai hle.
Khaw lum uchuak tak chu Thawhlehni atang hian a ziaawm hret rin a ni a, heti chung hian la lum tak a ni tho dawn tih khawchin zirtuten an sawi.
EU chuan Spain-ah hian thlawhna tirh luh a tum a. Dutch water-dumping plane pahnih luh belh tur niin France leh Italy atanga puitute an zawm dawn a ni.
Kang thelhtu pawh ram dang atangin Galacia-ah hian an thlen belh dawn bawk.
Interior ministry chuan June thla atang khan ram kang hi hal a nih ringin a haltu nia rin mi 27 man an ni tawh a, mi dang 92 thu zawh fiah an ni tawh bawk tih a sawi.
Portugal-ah pawh kuminah ram ngaw tha sq km 1,550 chuang a kang chhe tawh niin Institute for Nature Conservation & Forests chuan a sawi a, hei hi kum 2006 leh 2024 inkara kum tina kang thin zat chawhrual aiin a tam tawh a. Kumina kang chhia zahve chuang hi ni thum liam ta lek chhunga kang a ni.
Portugal-ah hian hmar leh ram lailia hmun riata kang nasa tak chu kang thelhtu sang telin an buaipui mek a, a nasa ber chu tlang ram mawi tak, khualzinte tlawh nasat thin, Piodao bul mai a ni.
Hmar lam deuhva Trancoso-ah pawh ni riat a kang tawh a. Khawchhak leh hreta a tenau deuhvah Zirtawpni khan mi pakhat a thi a, thi hmasa ber a ni.
Portugal-ah hian khaw lum a zia hret tawh dawn a, Aigust 2 atanga ram kang avanga inralrinna tihchhuah pawh Pathianni khan tihtawp a ni ta a, Thawhtanni khan Swedish firefighting plane pahnih an thleng bawk.
Portugal-ah hian kang thelhtu 4,000 chuang leh lirthei 1,300-in kang thelh hna thawkin thlawhna 17 an hmang bawk tih Civil Protection Agency chuan a sawi.
Greece, Bulgaria, Montenegro leh Albania ramte pawhin EU hnenah an rama kangmei thelhpui turin ngenna an thlen hlawm a. Nikuma ram kan hun lai puma inralrinna an tihchhuah zat an tichhuak tling tawh vek.
Tun hnaia mi 19 an thihna, Turkiye-ah pawh Pathianni khan hmarthlanga Indopui I-na hriat rengna hmun bul kang avangin inthiar chhuah a ni a, chenna in tam tak a derthawng.
Canakkale province Governor Omer Toraman chuan khaw parukah inthiar chhuak tura inring tura tihna pek an ni tih a sawi a. Kang thlehtu 1,300 chuang bakah thlawhna 30-in an bei mek tih General Directorate of Forestry chuan a sawi.
Turkiye-ah hian June atang khan ram kang hmun 100 chuangah chhuakin khua a lum a, boruak a ro va, thli a chak bawk avangin a kang duh hle.