Daily Newspaper

Spain lal hlui Juan Carlos an an ram a chhuahsan

23

Spain lal hlui King Juan Carlos chuan an ram chhuahsan tura thutlukna a siam thu royal palace te chuan sawiin hei hi eirukna a inhnamhnawiha puha chhui mek a nih vang a ni.

Kum 82 a upa Juan Carlos chuan a fapa King Felipe kum ruk kaltaa thuneihna a hlanchhawn tawh hnenah lehkhathawnin a hrilh a ni.

Juan Carlos chuan a thubuai chungchangah thuneitu tena an mamawh a nih chuan biak pawh theih reng a nih tur thu a sawi bawk.

Spain Supreme Court chuan high-speed rail contract Saudi Arabia nena inremna siamah Juan Carlos hi dan kalhin a inrawlh nia sawiin a chhui chian tir mek a ni.

Khawiah nge Spain lal hlui hi a chen dawn hriat a ni lo va, mahse, Spanish press te chuan Spain ram a chhuahsan tawh tiin an sawi thung.

Spain lal remhre tak mai kum 1975 a General Franco a thih hnua dictatorship atanga rem taka democracy a hruai luttu tana zahthlak tak tiin BBC Europe correspondent Nick Beake chuan a sawi.

Juan Carlos hian kum 2014 khan kum 40 dawn lal a nihna chu eirukna thubuaia a fanu pasal inrawlhna leh Spain in financial crisis a tawh laia Sai pela a chhuah boruak avanga sawiselna a tawh vangin a lal thutthleng a fapa hnenah a kian ta a ni.

A lehkhathawn ziahah thutlukna a siam chhan chu ‘mipui tena tun hma thil thleng leh ka mimal nunin sawhkhawk a siam vang’ tia sawiin a fapa chuan Lal a nih anga thlamuang taka rorelna a kalpui theih nana a tih a nih thu a sawi a.

“Spain mipui te Lal i nih ang a, tha thei ang bera i kaihhruai theih nan Spain chhuahsan ka tum thu hi ka hrilh che a ni,” tiin a sawi a. “Thinlung dehdan thuk tak leh dam dapin thutlukna ka siam a ni,” tiin a sawi bawk.

Zarzuela Palace chuan thuchhuah siamin King Felipe VI chuan zah tak chungin a pa thutlukna chu a pawm thu a sawi a.

Kumin March thla khan Felipe Vi chuan a pa atanga a rochan tur a lo hnawl tawh a, Royal Palace chuan Juan Carlos hnena annual grant $228,000 chu pek chhunzawm loh tur a ti bawk.

Spain Supreme Court chuan Juan Carlos an Saudi project ah inhnamhnawihna a neih leh neihloh chu June 2014 a immunity a neih loh zui hnuah a chhui tan a.

Spanish firm te chuan Meccca-Medina rail link siamna turin 6 billion pound an chang a. He thilah hian Swiss bank pawh an inrawlh nia sawi a ni bawk a.

Spanish anti-corruption officials te chuan Juan Carlos hian Switzerland ah pawisa a dah niin an sawi bawk a, Swiss investigation ten an chhui chiang mek bawk.

Spanish sorkar chu ‘mitin tan justice a inang vek’ tia sawiin inquiry-ah inrawlh an tum loh thu an sawi bawk.

The Aizawk Post
Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy