Spain player hmuia fawh kha…

Spain player hmuia fawh kha…
Pathianni zan Women’s World Cup lawmman sem laiin dawhsana dingchhuak zinga pakhat Spanish football federation president Luis Rubiales chuan khawvel hmuhah an player Jenni Hermoso lawmman dawng zo chu dan anga a bianga chuk keuh mai ta lo chuan pawm vawng vawng chungin a hmuiah tak a fawp bur ngawr ngawr a, dem a hlawh luai luai hnuah thupha a chawi ta nge nge.
England laka Spain-in 1-0 hnehna an chan zawh presentation ceremony-a Spanish FA hotupain Spain forward a fawp kha media lam chuan ‘shame of kiss’ tiin an sawi leh hman tawh a, Thawhtanni khan thupha chawina hmuh tur a awm nghal.
Hermoso pawhin Thawhtanni khan Instagram lamah a chunga thil thleng kha a duhdan a nih loh thu a tarlang ve tawh bawk a, chutih rualin Spanish football federation thuchhuahah kum 31 miin amah fawptu thlavang a hauhna tarlan tel niin, Spain tana goal khung hnem ber ni mek chuan ngaihtuahna sual rawngkai tel loa inngainat lantirna niin a sawi niawmin thuchhuahah chuan ziahlan a ni.
Hermoso thusawi an tarlan dan chu: “Pawn lam taksa inzawmna ni lo chhungrila World Cup hlawhtlin hlimnain a hrinchhuah chet lak dik tak a ni,” tiin.
Spain rama COPE Radio station-in an kawmnaah pawh Hermoso hian an pu ber fawh kha a ngai haw tehchiam lo niin a lang a, “Tute emaw chet dan an la vung mai mai niin ka hria a, kei hi world champion ka ni a, chu chu a tawk mai e,” a ti fel et!
Thawhtannia thuchhuah a siamah Rubiales chuan a chet dan kha a dik lo hul hual tih sawi chungin a tih dik loh a pawm tih a tarlang tel a, phurna a nasat tawh em avangin a chhe lama kawh dang nei miah loin kha thil kha a ti ta mai tih a sawi a, a hun lai khan a nih dan tur angin lang bawk mah se pawn lam atanga enin mawi lo leh ngaihkawih theih thil a awm tih a pha lo.
“Ka han ngaihtuah chiang a, thupha ka chawi a, president nih chuan fimkhur lehzual pawh a lo ngai nasa hle tih ka zirchhuak.”
Social media kaltlanga Rubiales sawiseltu hi Spanish government minister-te zingah pawh an kat nuk a, Spain equalities minster Irene Montero phei chuan hmei-chhiate’n nitin nuna hursualna an tawh dan a lantir niin a sawi a, hmeichhiate remtihna tel loa fawh ngawt a rem loh dan leh chutiang chu a thlen reng thu a tarlang tel.
Spain sports minister Miquel Iceta pawhin Spanish public radio kaltlangin kha thil thleng kha pawmzam theih loh a nih thu leh Rubiales khan sawifiah chunga ngaih-dam a dil ngei a ngaih thu a sawichhuak.
Lawmman semna dawhsana infawh video kha online lamah a darh nasa hle a; Rubialeskha stadium chhung VIP area-ah Fifa president Gianni Infantino leh Queen Letizia of Spain bula thuin, hamrik hnuhnung a rik ruala a thal bawr a han nul thuakte chuan thlir a hlawh zui ta hle nghe nghe!
Rubiales sawiseltu thenkhat duhthawh zualte chuan a hna vawn lai atanga bang turin an ngiat hial a ni.
Spanish broadcaster COPE hnena Rubiales insawithiam dan chu ‘engnge maw lawma thian pahnih infawp mai a ni a, thil dang daiha lo hmuhsaktute chu mi mawl leh chhawih an ni’ tiin!
“Chu’ng mite chu hnawlin thil tha kan chante zawk hi i enjoy zawk teh ang u,” tih a zep tel a, mahse, a hnuah thupha chawina ziktluak a tichhuak ta tho a ni.
Spain rama an chanchinbu hralh tla ber El Pais chuan Pathianni zana thil thleng kha an opinion column headline-ah hmangin, ‘Jenni khan Rubiales-a fawh kha a duh lo a, keini pawhin chuti tho’ tih an tarlang a, mimal nun rawkna leh palzutna dik tak, midang laka tharum thawhna a nih thu chu ngaihdan thawhtu tam ber thu vuakthlak a ni.
A tir lama tarlan tawh angin, Rubiales hian federation hnenah thupha chawina video thawn tawhin, tah chuan a tisual chhiava tih leh chu chu amah pawhin a pawm thlap tih a sawi a, Thawhtanni zana champion team ruala Madrid khawpui an thlen hlimah Rubiales hian chanchinbumite zawhna a chhang duh lo a, Reuters hnenah an hun tawn mek chu hlimpui hun a nih thu leh world cup hnehtu an nih thu a hrilh.