Daily Newspaper

Spain sorkarin Madrid khawpui lockdown turin ngen

9

Spanish sorkar chuan Madrid thuneitute chu coronavirus khuah khirhna khawpui chhungah khauh zawka kalpui tura ngenin, an ti lo a nih chuan nasa zawka chhiatna thleng thei a nih thu an sawi.

Kar kalta Zirtawpni khan Madrid chuan khuahkhirhna kalpui a pawtsei a, mahse khawpui pum lockdown tura rawtna chu a hnawl thung a ni.

Spain Health Minister Salvador Illa chuan tuna khuahkhirhna an kalpui hi chu a tawk lo tiin a sawi a. “Panemic thu nun tura tumruhna nena chetlak ngai a ni,” a ti a.

“Khawpui chhunga cheng leh thenawm biala chengte tan dinhmun duhawm lo tak a awm mek a ni” tia sawiin Illa chuan Capital region thuneitute chu khua leh tuite hriselna dah pawimawh hmasa ber tura ngenin khawpui pumah partial lockdown puang turin a ngen.

Spain-ah hian healthcare bik hi regional sorkar thuneihna niin central sorkarin khuah khirhna kalpui duh teh mahse thuneihna a nei lo.

Madrid khawpui chu Spain-a coronavirus leng nawn mekah a nasatna ber a ni leh a. Kar kalta Zirtawpni khan virus kai thar 12,272 awmin tihian ram pumah virus kai 716,418 nei tawhin Western Europe ram zinga Covid-19 kai tamna ber ram a ni.

Spain leh northern hemisphere-a ram dang dangte chuan tun hnai karah virus leng thawh hnihna an tawng leh mek a.

WHO chuan virus leng nawn leh chu ngaihmawhawm a tih thu sawiin Europe leh hmun dang dangah thlasik a hnaih tawh avangin boruak a duhawm lo hle an lo ti tawh bawk.

Europe hmun dangah pawh Poland, Russia leh Czech Republic-ah te Covid-19 kai nasa takin an pung thar a. France ah pawh nasa takin kaithar an pung bawk.

Madrid region ah hian Spain a Covid-19 avanga nunna chan leh kai hmun thuma thena hmun khat lai an awm a. Tun hnaiah coronavirus kai pung nasa hlein hei hian health system dinhmun der thawngah a siam zui nghal a ni.

Tun hnai ni 14 chhungin Marid bikah mi 100,000 ah 746 zelin virus kai ang an nih thu El Pais chanchinbu chuan a tarlang a, Spain pum ang chuan 320 ang zel a ni thung.

Spanish sorkar leh Madrid regional authority te chu hmalak dan turah an ngaihdan a inang lo bawk si a ni. Madrid thuneitute chuan lockdown kalpui an duh lo va, mahse, khuahkhirhna pawhsei erawh a remti thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy