Spain tawnga buai lo Real No 9 thar Mbappe
Real Madrid player ni tura Thawhlehnia an lawmluh tak Kylian Mbappe khan Santiago Bernabeu mipui mak tih khawpin Spanish tawng a thiam nal a, a eizawnna ram thar turte tawng hman ngei maia nal fahrana thu a han sawi zat zat khan chanchinbumite pawh a tiphu zawk!
La Liga giants Galactico hnuhnungber ni ta rih hian stadium chhung khat vek mipui pungkhawm hmaah French captain hian Spanish a thiam nal hle tih a lantir a, lawmluh inkhawm (unveiling ceremony) zawh press conference-ah a hna thawhna ram tur tawng a thiam dan a sawifiah.
Real Madrid tana khelh chu a naupan lai atanga a tum ngar ngar a nih thu leh chu hun chu eng tik niah emaw a herchhuak ngei dawn tih hriain sikul lamah pawh thahnemngai ru angreng takin Spanish a zir thin tih a sawi a, Paris St Germain a zawm hnuah pawh a la tangkaipui dawn tih hriaiin Spanish tawng hmang manager a hrawn pahnih Luis Enrique leh Mauricio Pochettino-te kaltlang khan a practise zui tang tang tih a sawi!
“Sikulah kha chuan Spanish class-ah ka titha hran lo a, mahse, Real Madrid tana khelh hi ka mangphan tlat avangin an tawng lo thiam lawk chu Madrid ka thlen huna ka insiamrem zung zung theihna turin a tangkai dawn tih ka hria a, theihtawp ka chhuah zui zel a ni,” a ti.
Kumin June thla mai khan Real Madrid president Florentino Perez chuan kum engemawzat an lo hel hlawhchham tawh Mbappe chu free agent ni chungin kum nga daih contract an ziahpui thei dawn ta tih a puang a; tunkar Thawhlehni khan Santiago Bernabeu ngei maiah a pual hian lawmluh inkhawm buatsaih niin, he hunah hian Real Madrid player leh manager hlui ni bawk Zinedine Zidane chuan a lo lawm a; France captain hlui hian a chipui Mbappe chu kum 2012 daih tawh khan rawlthar tir kum 13 mi lek a nih laiin Real Madrid tlawh tur hian a lo sawm tawh a, tunah hun pawimawh an tawngbaw dun leh ta a ni.
Tarlan tawh thin angin, Real hian hun rei tawh tak atang khan PSG atanga Mbappe hruaichhuah hi an tum thin a, mahse, Spanish club dawrna chu Ligue 1 club-in an hnawlsak leh thin a, Mbappe pawh an chhuahtir duh loh avangin han hel phat phat thin mah se duhthlan tur dang awm hek lo le May 2022 khan a contract neih laite a han pawtsei leh rih a, mahse, amah leh an mit itzawng hlah zen zen lo La Liga club-in an duh miau avangin PSG tan dan zawh ngaihna a awm ta lo a, sum siamna’na hman lawih theih tur kha man nei loin an chhuahtir a ngaih phah ta nghe nghe a nih kha!
Bernabeu stadium mipuiin an No. 9 thar hming leh number chuanna jersey an ha thup a, an player ropui ber berte kalbo hnua an arsi lian ni leh thei tura an beisei 2018 World Cup winner chu a ropui thei ang berin an lo lawm a ni.
A puala hun hmanah thu sawiin Mbappe kha a nu leh a chhungte dangin an tawiawm a, No. 9 thar nena Madridistas hmaa phochhuah a nih laiin a nu phei chu a insum zo lo a, a tap hial a ni.
Madrid mipui pungkhawm hmaah Spanish ngei maia thu sawiin Mbappe chuan Real a thleng thei ta chu a mumang a taka lo chang ta nen a tehkhin a, Madrid a zawm theih avangin Real Madrid president Florentino Perez chungah lawmthu a sawi bawk.
“Ka tan chuan he hun tawnbuak hi a awihawm loh hial zawk a, naupang ka nih lai atang tawhin Madrid tana khelh hi ka duhthusam a ni thin a, vawiin chuan he hmunah hian ka lo ding ta reng mai a, ka tan chuan thil naran a ni lo,” a ti.
June ni 3-a dan anga Bernabeu club zawm fel tawh Kylian Mbappe hian lawmluh niah Real Madrid shirt var hachhuakin, lawmluhna chu a paltlang ta phawt a, Spain leilungah engtiang taka hlawhtling nge a nih dawn kan thlir zui ang.
France captain hian season sarih chhungin Ligue 1 title paruk a la tling a, Paris Saint Germain tan goal 255 thun tlingin, French club player chhuak tawh zawng zawng zinga goal khung hnem ber a ni.
Ligue 1 title chuti zat bakah French cup pali a sualchhuak bawk a, mahse, PSG chu Champions League-ah a hlawhchhampui fel hmul fai thak a, footballer ropui bikte dawn thin Ballon d’Or pawh a ban phaka hun hnaih a la ni lo!
European Championship zawh zel takah khan Mbappe hian France chu semi-final a paltlangpui zo lo a, an game hmasabera Austria an tum tuma a hnar ruh a titliak khan a tournament boruak pawh a pawthniam ve bawk niin a lang.
A club thar a pan hnuah Real Madrid medical team leh manager Carlos Ancelotti berawn chungin a hnar ruh tliak chu zai that leh a ngai dawn em tih an sawiho tur thu a sawi.
Kum 25 mi lai ni ve ta Mbappe hi Brazilian attacker chimawm Vinicius Jr. leh Real Madrid zawm fuh mangkheng English striker Jude Bellingham-te nen goal thun kawngah an thawkho dawn a, title panga laa Champions League history-a coach hlawhtling ber ni mek Ancelotti chu a pu thar a ni dawn bawk a, a la hlawhtlin ve lohna Europe club inelna sangberah hian a champion zui ve tawh mai tura ngaih a ni!
Mbappe hi club leh ram tan left-sided attacker angin a khel tlangpui thin a, he position chiah hi Brazilian Vinicius-a thiamna a lo ni ve chiah bawk a, Real Madrid tlarhma lamah hian veilam hmunhma inchuhna a piang mai dawn em tih zawhna a len chhoh mek laiin Mbappe chuan buaina tur a awm loh thu a sawi:
“Tlarhma a nih hrim chuan position pathumah hian ka khel thei vek a, a lai a ni emaw a sir dinglam leh veilam a ni emaw ka tlanna tur lamin min tibuai ve ngai lo. Ka tum ram ka thleng tawh a, ka team thara insiamrem chu ka tihtur a ni mai…”
Spain tawnga buai lo Real No 9 thar Mbappe
