Spain transgender football team hmasaber Fenix Football Club!

Spain transgender football team hmasaber Fenix Football Club!
Spain rama a hmasaber atan hmeichhiaa an lo pian zet hnua damdawi thiamna hmanga mipaa inlet (transgender men) rual ngat awmna (first federated transgender soccer team) Fenix FC chuan dan ang taka team nihna (federated status) an chang ta a, tunkar Thawhtanni khan an game hmasaber an khel nghe nghe!
La Liga khelhna ramah hian football league a inkhaidiat thla duah a, a chhuk zawnga chhiarthlaka leven ngana (fifth tier) regional league khel turin Fenix FC chuan dan ang takin phalna an hmu a, Thawhtanni khan Barcelona khawpui atanga hla lo tak Palleja khawpuiah transgender team Fenix hian Catalan regional league-ah Palleja CF B an hmachhawn a, nihna thlakdanglam rual awmkhawmna squad zingah Europe khawmualpuia team puiling ni tura pawmpuina hmu hmasaber an ni.
Season liamta khan thawnthua sava chi khat piang nawn behchhana hming phuah Fenix FC hian friendly match leh seven-a-side game engemawzat an khel a, tunah chuan Catalonia hmarthlang bialte football-a inelna league-ah dan ang takin an inziaklut a, an match hmasaber an khel ta hial a ni.
Nikum mai khan Spain hian nihna thlak duhte dikna humhimna dan (trans rights bill) an pass a; he danah hian awlsam taka miin a mipat hmeichhiatna (legal gender identity) a thlak theihna kawng hawnsak a ni.
He dan hian dodal pawh a hlawh a, nikum chhung khan Catalonia bialah chuan mihring nihphung piahlama nung kan tih (LGBT – lesbian, gay, bisexual, transgender – tuai, patil, neikawp or duhkawp leh nihna thlak) mite laka enhranna leh hleihlenna case hi 302 ngawt ziahluh a ni a, an zinga tuartu tam ber hi transgender-te an nih thu he lai ram biala LGBT leh a kaihhnawih zirchiangtute chuan an sawi.