Speaker-in House member-te a zilh

Speaker-in House member-te a zilh
Assembly Budget Session neih meka House chhunga member thenkhat awm dan leh tawng duh danah mipui lam atanga sawi leh sel a tam avangin Assembly speaker Lalbiakzama chuan House chhunga awmdan leh House zahawmna tih bawrhban theihna kawngah member-te a zilh a, hemi kawnga tan la thar turin a fuih bawk.
Thawhtannia Assembly Session tan veleh speaker hian, tunhnaiah House proceedings chungchangin a tha lo zawngin sawi a hlawh viau a, member-te chetdanin sawi bawrhban a hlawh ta deuha ngaih theih leh, speaker-in House zahawmna vawnghim tawk loa sawi a awm ta fo tih a sawi.
Tunhma Mizoram Legislative Assembly member-te House chhunga inrelbawl dan chuan fak a hlawhin a thang mawi hle thin a, rorel inkhawm hi live-a pekchhuah a nih hnu in, hnamdang ho tih dan kan entawn emaw tih turin, member ding lai tihbuai hrim hrim duh vanga lo auhbuai, hun pek nasa taka bawhpela thusawi luih, speaker address loa direct-a member dang in-address mai leh, thildang mawi lo tak tak a thleng ta fo tih a sawi a ni.
Hengte hian Handbook for Members in member-te awm dan tura a sawi a kalh tih hriatnawn thaa a duh tih sawiin, “Member-te hian dikna chanvo kan nei a, mah se, heng right hian mawhphurhna hlen tur a keng tel. Right ka nei tih vanga mahni mawhphurhna theihnghilh thaka House chhunga sapatal a rem loh bakah he House leh mipui zahlohna lian tak a ni,” Lalbiakzama hian a ti.
House-a member-te awm dan tur a beisei dan leh House zahawmna kengkawh tura hma lak a tum dan a sawi fo chuan bengkhawn a hlawh lem lo hlea a hriat thu a sawi a. Member-te chet dan duhawmlo tak hian House dan leh kalphung anga lo neih a kalh bakah session hun chhung a tireiin officials leh mipui tan harsatna a siam thin, tiin, House zahawmna tuaithara vawnghim turin hma a la dawn tih a sawi.
House-a thusawina hun chungchangah member-te chu hun hman zat tur a rawn thlap chungin, an bawhpelh nasa lutuk thin tih a sawi a. Tun chinah chuan warning bell leh hun tawp (final bell) a rik hnuah, member dinglaite thusawi kal laklawh awm thei a nih avangin minute 2 an innghak anga, chumi hnua a thusawi titawpa a thu mai lo a nih chuan a mic an off sak tawh dawn tih a sawi a ni.
Member pakhatin phalna hmua thu a sawi laiin, member dangten thusawi thei lo leka an lo tibuai thin chu House dan a kalh a nih bakah rorelna hun a tul loa khawhralna a tih a sawi. “Point pawimawh clarify tura han zawh lawk ang chu thil awm lo pawh a ni loa, member thusawi lai tihbuai tum hrim hrim niawm tak a, a sawi laia lo din sek hi thil tul lo leh tha lo tak a ni. Hetiang hi kan vulh zel anih chuan Vai ram ang maia rorel hleithei loa kan inchhuah mai a hlauhawm a. Heng thil hi a thleng leh a nih chuan, member thusawi lai tibuai zawnga member tawng chhuak mic chu off sak an ni tawh ang,” a ti.
House chhungah member-ten social media-a mipui ‘play’ ni awm tak a, hnamdang legislators tihdan entawna mipui hmuha intihlar leh mipui hmin tumna tawngkam tui tam tum luatah House dan bawhpelh a ni thin nia a lan bawk thu speaker hian a sawi a. House rorel lai live-a tihchhuah chu tihtawp rih mai tur nge, tih ngaihtuahnaah a awm hial tih sawiin, hei erawh tih tul loa an insum a beisei tih a sawi.
Member-ten member dangte hriat tura an sawi pawh nise, ‘chair’ address hram hram tur leh, third person anga ‘in’ tih aiah ‘an’ tih ang chi hmang zel turin a chah bakah zawhna zawhin, zawhna hmasa ber persan lutuk zawhna dang siam loa, thuhma neih duah loha zawhna zawt mai turin a ngen tih a sawi bawk.
“Kan House inrelbawlna fak hlawh thin hi kan chhawmnun a pawimawh a. Kan hunah chuan House zahawmna vawnhim a, hnuhma mawi tak kan hnutchhiah hi kan zavaia mawhphurhna a ni,” Assembly speaker hian a ti.