Daily Newspaper

Speaker leh Dy. Govt Chief Whip ten SOP an bawhchhia – MPCC

22

Assembly speaker leh deputy govt. chief whip te chuan Mizoram sawrkarin hrileng laka himna tura inkaihhruaina (SOP) a siam chu an bawhchhia nia sawiin, an kalna district bawrhsap ve ve te chu action la ngei tura an beisei thu Congress party chuan an sawi a. Action hi lak a nih loh chuan sawrkarin SOP zawm turin mipui an phut ngam tawh bik tur a ni lo tih an sawi.

MPCC thuchhuah chuan, Dampa bialtu MLA Pu Lalrintluanga Sailo, Dy. Govt. Whip chuan Covid-19 vanga Mizoram mipui kan inkhung beh tlat laiin 2021 July 22-23 khan a bial chhung khaw hrang hrang a tlawh tih sawiin, a official tour programme-a a lan danin official leh MNF party hruaitu mi 17-in an zui tih a sawi.

‘Lalrintluanga Sailo, MLA hian a bial chhung khaw hrang hrang – Phuldungsei, West Phaileng, Kawnmawi, Chhippui, Lallen, Saithah leh Phulbial a tlawh a. July 23 hian Samagra Shiksha hnuaia sak Phuldungsei HSS hawnna programme-ah khuallian a ni a, hemi ni vek hian Dampa West Block MNF programme siamah a tel bawk. A bial chhung khaw hrang hrang a tlawh lai hi AMC huamchina Covid-19 kai an tam lutuk avanga inkharkhip bur puan lai a ni a. Mamit DC pawhin 2021 July 17 khan SOP tichhuakin, mipui punkhawmna hrim hrim a khap lai, sawrkar hnathawkte pawh 50% chiah kal a phal lai a ni a. Thingtlang khaw hrang hrangin Aizawl atanga zin veivakte an hlauh vanglai tak a ni a, khaw hrang hrang VLTF-te pawhin dan khauh taka an kenkawh lai tak a ni,’ tiin, heti chunga thil tul leh hmanhmawhthlak em em pawh ni loa official programme siam lui a, official leh party mi a inzui tir duah te, party programme siam luih a nite chu mipui zah lohna leh dan palzutna dik tak a ni tih a sawi.

Kumin July thla tir khan Assembly speaker Lalrinliana Sailo pawhin chhiattawhna chhuanlamin a bial hlui, deputy CM bial – Tuichang huamchhung Khawhai leh a chhehvel khaw hrang hrang a tlawh tih MPCC thuchhuah hian a tarlang bawk.

‘A team-te nen mipui vantlang zingah an kalkual nasain, YMA hnatlanna thlengin an kal a. Hlau chung chungin khaw hrang hrangah an lo dawngsawng a ni. Hei hi Aizawl khawpui ang maia hri kaidarh hlau em em thingtlang mite pawisak lohna a nih bakah VLTF-te palzutna nasa tak a ni,’ a ti.

Assembly speaker leh deputy govt. chief whip-te chetdan chuan MNF sawrkar hruaituten Mizoram mipui an zahloh zia a tarlang chiang nia sawiin, ‘Covid-19 hrileng vanga khuahkhirhna khauh tak hnuaia mipui kan khawsak mek lai a, zalen taka khaw hrang hrang an tlawhkual hi hriatthiam theihah kan ngai lo a. An kalna district deputy commissioner-ten action an la ngei turah kan ngai a ni; action an la lo a nih chuan SOP zawm turin mipui an phut ngam tawh tur a ni lo. Tham lo taka an palzut VLTF leh khaw hrang hrang mipuite hnenah ram hruaitute pahnih hian ngaihdam an dil ngei tur a ni bawk,’ MPCC thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy