Daily Newspaper

Sports Personality of the Year 2021 – Raducanu

21

Tleiawl kum 18 ni chunga kumin US Open champion ni thei Emma Raducanu chu BBC Sports Personality of the Year 2021 atan thlanchhuah a ni.

Kumin September thla Flushing Meadows final-a 6-4 6-3-a tleirawl ve thi Leylah Fernandez hneha US Open title a lak rual khan Raducanu kha Open era an tih huna qualifier zinga Grand Slam title la thei hmasaber niin, kum 2004 Wimbledon title latu Maria Sharapova hnu lama women’s Grand Slam champion naupangner ni bawkin, Briton zinga Grand Slam title la thei naupangber a nih bakah Serena Williams (2014) hnu lama set khat mah hloh loa US Open hmeichhe singles title la leh thei hmasaber a ni nghal bawk.

Ranking 345 atanga world number 19-na luah chunga kum 2022 chuangkai tur Raducanu hian Britain-in kum 44 teh meuh women’s Grand Slam singles champion an lo nghah tawh chu a nghahchhuahtir a, coach thar Torben Beltz nen season tharah a inlan ang.

Flushing Meadows-a a grand slam title hmasaber a sualchhuah hma khan kumin July thla maiah a Grand Slam main draw debut nghakchhuakin, Wimbledon fourth round a thleng a, bar thla kan chuankai meuh chuan khawvel barakhaihin US Open champion thar a rawn ni chho a, Britain ram infiamna huanga ngaihhlut hlawh kumkhua BBC Sports Personality of the Year 2021 thlannaah vote hmu sangber a rawn ni chho ta hial a ni.

Mipui vote-ah diver Tom Daley chu pahnihna niin, vote hmu tam pathumna chu swimmer Adam Peaty a ni.

Award pui ber dawng thei tura khalhfal (shortlist) zingah Manchester City leh England forward Raheem Sterling, boxer Tyson Fury, Great Britain-a Paralympian hlawhtlingber Sarah Storey-te an tel.

Raducanu chuan nominee dangte a thlir a, award puiber a dawng chu chawimawi-na a nih thu leh a hlim em em thu sawi chungin tunhma lama Sports Personality of the Year sem a lo thlir tawh thin thu leh award dawng tawhte a ngaihtuahin thlan-chhuah a ni ve ta mai chu a tan chawimawi-na a nih thu a sawinawn mawlh mawlh.

British number one Raducanu hi kum 1977-a dawngtu Virginia Wade hnu lama hmeichhe tennis player zinga Sports Personality of the Year lawmman dawng leh thei hmasaber niin, Wade kha Raducanu lo lan hmaa British hmeichhe zinga Grand Slam singles title la thei hnaivaiber a ni nghe nghe.

Kum 2016-a a vawithumna atana dawng Andy Murray chu Raducanu hmaa tennis player zinga he award dawng thei hnuhnungber niin, tuna Tindall ni ta, Zara Phillips kuta kum 2006 award hlan a nih hnuah Raducanu hi hmeichhe zinga he chawimawina dawng leh thei hmasaber a ni bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy