Sawrkar laipui hotute dawra kal Sports & Youth Services minister Lalnghinglova Hmar chuan kar kalta khan Union Sports minister Mansukh Mandaviya chu New Delhi-ah a kawm.
India ramin 2036 Olympics thlen a tumnaah Mizoramin tel ve ngei a duh thu leh Mizoramin Sports Conclave buatsaiha bul a tan tawh thu Mizoram minister hian a hrilh a. Hemi kawnga hma lakpui tura a sawmna chu Union Sports minister hian project siama a rang lama thehlut turin thurawn a lo pe.
“State lian lo tak, mihring pawh tlemte awmna kan ni chungin India ramah sports avangin hriat kan hlawh a, state rethei zawk tan budget-ah sports hmasawnna tur dah tam a harsa si a, sawrkar laipuiin min puih zel kan ngai a ni,” Lalnghinglova Hmar hian a ti a. Puih a lo tiam a ni.
Mizorama zina sports hmasawnna tur a hmun ngeia sawi dun a sawmna chu Mansukh Mandaviya chuan tihlawhtlin a tum a, kumin chhung ngeia Mizoram tlawh a tum thu leh, Mizoramin ‘Vision 2036 Olympics’ a neih chu lawmawm a tih thu a sawi.
Union Labour minister ni bawk Mansukh Mandaviya leh Mizoram LESDE minister Lalnghinglova Hmar te hi Labour ministry hnuaia hamthatna awmte hai chhuak tur leh chiang zawka indawr chhunzawm turin an inthlah a ni.
Mizoram Sports minister hian Union Sports secretary Sujata Chaturvedi pawh kawmin, sports hmasawnna tura hmachhawp sawrkar laipuia bawhzui ngaite a bawhzui a ni.
Sports project siama thehlut rang turin Union Sports minister-in a ti
