Nilaini zing khan NBA Conference semi-final khelh a ni a, San Antonio Spurs chuan a vawi thum nan Minnesota Timberwolves hnehin final an hnaih. Timberwolves laka an chak nawn leh tum hian Spurs an Viktor Wembanyama a chetha leh hle.
Western Conference semi-final-ah San Antonio Spurs leh Minnesota Timberwolves te an inhnehtawk viau a, game hmasa paliah 2-2 a inhnehtawkin chungnung zawk an awm thei lo. Nilaini zinga game ngaah erawh Spurs an chungnung viau a, point 29 zetin an khingpuite an sawp.
Spurs hian Timberwolves lakah bul an tan tha a, quarter khatnaah point 4 in an chungnung nghal. Quarter hnihnaah khelh tha lehzualin point 8 in an chungnung a, point 12 a hmahruai chungin chawlhlawk an hmang.
Chawlhlawk hnu lamah Spurs an khel tha chhunzawm a, quarter thumnaa point 6 a chungnungin an hmahruaina an tizau leh zual a Quarter hnuhnung berah tha zuala zawka inlanin point 11 zetin an chungnung zui leh ta mai a. Inkhel pawimawh takah point 126-97 in hnehna an chang a, series ah 3-2 in hma an hruai ta chiah a. Final lut turin vawi khat chak chiah an mamawh tawh. Spurs hian Timberwolves an hneh a nih chuan champion lai Oklahoma City Thunder chu Western Conference final-ah an hmachhawn ang.
Timberwolves laka an chak hian Spurs tan kum 22 mi Victor Wembanyama a chetha leh viau. NBA 2025-26 a defensive player tha ber Wembanyama hian point 25 a thawhchhuah bakah ball sawhlet vawi 15 a dawng tling a, assist vawi nga a nei tel bawk. NBA post season-ah game khata hetiang puitlin thei naupang ber a ni hial nghe nghe a ni. Games hmasaah hlauhawm taka a chet vangin hnawhchhuah a ni a, a mualpho hnu lawkah hmingthatna nen Wembanyama a thochhuak leh nghal a, a pawimawhna a lantir chiang hle.
Spurs in final an hnaih
