Site icon The Aizawl Post

Spurs in Fulham an hneh

Thawhtan zan khan English Premier League ah inkhel pakhat a awm a. Graven Cottage a lenglut Tottenham Hotspurs chuan Harry Kane goal thun hmangin hnehna an chang. Fulham laka Spurs chakna goal thuntu Kane hian Tottenham tana goal thun hnem ber ni reng thin Jimmy Greaves record a nih rual.
Tunhnaiah Manchester City leh Arsenal laka tlawm zawn, hma an sawn hleih theih loh vanga manager Antonio Conte pawh a dinhmun derthawng hman hial; Tottenham hian Graven Cottage ah hnehna chan ngei tumin thapui an thawh. Pasarihnaa awm mek Fulham pawhin an mualah hnehna changin, hma lam pan ngei an tum ve bawk. Goal thun tumin team hnihte an innawr tawn nasa viau a, an khel pawh a hmuh-nawm viau bawk.

Inkhel hmuhnawm takah goal lut a awm theih lawk loh hnuin chawlhlawk dawn hnaih minute 45+1 ah England captain Harry Kane chuan hmahruaina goal a thun. Fulham laka Spurs hmahruaina goal thuntu Kane hian Tottenham tana goal thun hnem ber Jimmy Greaves goal thun zat a nih rual chiah. Spurs hrang lui Greaves hian Kum 1961 atanga kum 1970 chhung khan Tottenham tan hian inelna hrang hrangah vawi 379 a khel a, goal 266 zet a thun. Hun rei tak chhung Tottenham tana goal thun hnem ber a nih reng hnuin thawhtan zan khan Harry Kane chuan a rawn nih rual a. Greaves record hi Kane hian thaichhe zui thuai tura ngaih a ni.

Kum 29 mi Kane hian kum 2011 khan Tottenham tan a khel tan a. Kum 2011 Europa League a Shamrock Rovers an hmachhawn tumin Spurs tan a goal hmasa ber a thun. Tottenham Hotspurs tan hian inelna hrang hrangah vawi 415 zet khel tawhin, goal 266 a thun tling tawh a. Greaves kalsan in, Tottenham tana goal thun hnem ber ni thuai tura ngaih a ni. Kane hian Premier League bikah vawi 300 khel tling tawhin goal 199 a thun tling tawh a. EPL a goal thun hnem pathumna niin, a chungah hian goal 260 thutu Alan Shearer leh goal 208 thun tawhtu Wayne Rooney te an awm. England forward Kane hian season kal mekah Spurs tan inelna hrang hrangah vawi 29 inlan tawhin, goal 18 zet a thun tawh bawk.

Chawlhlawk hmaa Kane goal thun bak hi hun tawp thlengin goal dang a luh belh thei tawh lova, Tottenham hian point thum hmuin, top 4 huang an hnaih leh phah sawt a ni.

Exit mobile version