Daily Newspaper

Spurs muala inkhel tur Joshua

27

Anthony Joshua chuan September ni 25 khian Tottenham Hotspur Stadium a lut dawn a, a khelh tur erawh football ni loin boxing a ni!

Kum 31 mi Joshua hian IBF, WBA leh WBO kawnghren a kawl lai thapin Spurs khelmualah hian a title kawl lai chuhpui thei tur tehkhawnga tling (mandatory challenger) Oleksandr Usyk a hnek dawn tih nemngheh a ni.

Tottenham Hotspur Stadium hi mipui 60,000 chuan glenna niin, bar thla inhnek hi a hmunah mipui 20,000 emaw a aia tam hretin emaw an chhim thei dawn a, khelmual lut turte chuan vaccine an la ngei tih lanna an neih a ngai thung ang.

Briton Joshua leh a chipui Tyson Fury chuan hruihrual chhunga luh tumin thla engemawzat inbiakna an kalpui tawh a, a thu chuan inremna pawh an peihfel tawh a, Joshua title kawl pathum bakah Fury kawnghren kawl lai WBC belt nen tumkhata heavyweight title pali inchuhna hmasaber khawvelin a beisei mek laiin American Deontay Wilder chuan Fury nena vawithum inhnek tura contract an ziahah vawikhat an la hmabak chu tlingtla turin court lamah a kal a, thiam a chan tak avangin a vawithumna atan Fury leh Wilder an inhnek leh rih a ngai.

Joshua pawhin a WBO title kawl lai thehchhuak turin thupek a dawng a, dan anga amah cho theitu Ukrainian Usyk lam a hawi a ngai zui ve ta a ni.

Kum 34 mi Usyk hian tunhma lamin a career-ah heavyweight title chuhin hruihrual chhung a la lut ngai lo a, division hniam zawk cruiserweight-ah erawh kawnghren pali a lo hnekchhuak ve tawh thung.

Joshua chuan Spurs muala an inhnek tur chungchang sawiin, “Chotute pumpelh tuma tlanchhe ngai lo Olympic gold medallist ve vein ropuiber nih kan inchuh dawn a; kan inhnekna tur khelmual hi duhthusama tha niin, a boruak hrim hrim pawh hi a tek chhuai a ni ber a, chutiang hmun ropui bika inhnek hmasaber ka ni tur hi ka tan chawimawina a tling a, he inhnek atan hian ka inpeih thlap tawh e,” a ti.

Tarlan tawh thin angin, Joshua leh WBC world champion Fury-te’n kawnghren pali inchuh an tumna kalkawngah August ni 14 kha an ruat zet a, Fury lamin harsatna tawka an insawi avangin Saudi Arabia rama inhnek tumna thulh a nih hnuah Joshua chuan a lungawilohna a auchhuahpui a, a chipui Fury chu bumhmang ti hialin a sawi.

Fury hian a inhnek hnuhnunber tum February 2020-a a hneh hnu American Deontay Wilder bawk kha a vawithumna atan tun July ni 24 mai hian Las Vegas-ah a hmachhawn leh dawn a, nikuma American a hneh avang khan a tumhnihna atan world heavyweight champion a nih phah a, Wilder-a phuba lak tumna hmachhawn turin US leilung a pan dawn a ni.

Joshua hmachhawn tur undisputed world cruiserweight champion Usyk hian vawi 18 a inhnek tawhah a tumpuite a la hneh fai vek a, Briton mihang fighter lakah fiahna tak tak a nghakchhuak dawn.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy