SS Zirlaibu leh Nilai thupui bu tichhuak
Mizoram Presbyterian Kohhran chuan nakkum, 2025 atana Puitling Sunday School zirlaibu bakah Nilai leh Beihrual Thupui zirlaibu chu lei theihin a tichhuak tawh.
2025 Puitling Sunday School zirlaibu tur hi Rev Dr LH Rawsea ziah “Thuthlung Thar Zirtirna” tih a ni a. He zirlaibu ziaktu hi Presbyterian pastor-te zinga mithiam leh tawnhriat ngah tak, Mizoram Synod-in Thuthlung Thar mithiam a neih zing ami a ni. Pro. pastor a nih lai atanga Aizawl Theological College-ah a hun tam ber lecturer hna thawkin, kum 2024 atang khan Melriat Pastor bial vawng tura dah a ni.
He zirlaibuah hian zirlai 46 awmin, phek 268-a chhah a ni a. Mizoram puma Synod Bookroom dawra lei theih a ni a, Rs.100 man a ni.
Kum thara Mizoram Presbyterian Kohhran Puitling Sunday School zir tur hi zirlai bu 101-na a ni a. Kum 100 chhung hian Puitling Sunday School zirlai atan Thuthlung Thar bu chhung ami vawi 47 zir a ni tawh a, Thuthlung Hlui nen inkawpin vawi 8 zir a lo ni tawh bawk.
Mizoram Presbyterian Kohhran Puitling Sunday School zirlaibu hi Mizoram Synod hnuaia kohhran zawng zawngte zirlaibu a nih bakah Presbyterian Church of Myanmar (PCM) hnuaia Synod-ten an zirlaibu atan an hmang ve nghal zel a. Kumthar lamah pawh Presbyterian Church of Myanmar hian an zirlaibu a ni ve leh dawn a ni.
Nakkum, 2025 hian Mizoram Presbyterian Kohhran chuan Nilai leh Beihrual Thupuiah “Kohhran Inpumkhatna” tih an zir dawn a. Presbyterian pastor-te zinga mithiam leh thuhril mi, ATC-a lecturer, Field secretary leh Bial hrang hranga pastor hna lo thawk tawh Rev R Lalrosiama ziah a ni. Tunah hian ITI Pastor bial a vawng mek.
Tun tum thupui bu hi phek 229 a chhah niin, Rs.120 a hralh chhuah a ni dawn a. Synod Bookroom dawrah lei theih a ni ang.
SS Zirlaibu leh Nilai thupui bu tichhuak
