Congress president Lalsawta chuan an sorkar leh a nih chuan SSA zirtirtute harsatna chin fel a tiam a, an hna ngai an thawh leh ngei theihna atan hma kan la ang, a ti.
Zirtawpni khan Bhawan-ah Friday Political Session leh mi thar lawmluhna hun an hmang a, he huna thusawitu Lalsawta chuan SSA zirtirtu lungawi lote hi High Court-ah sorkar nen an inkhing a, hnehna an chang chungin, MNF sorkar hian an duh ang a tihhlawhtlin sak thei lo a, a pawi ka ti hle a ni, a ti. Congress party kan sorkar a nih chuan SSA zirtirtute harsatna hi kan chingfel ang a, an hna ngai an thawh leh vek theih nan ruahmanna kan siam ang, a ti.
Ram chhungah indona a chhuak niin a sawi a, “China leh Pakistan te nena kan indona kha chu a dan a dang daih a. Ram leh ram, ram pawn indona a ni. Ram chhung ngei atanga runna hi India ram leh Mizoram hian kan tawng a. BJP hian Hindutva hi atchilhin, India ram hi Hindu Lalna ram a ni tur a ni tiin UCC tih puitlin an tum a. Parliament Session hnuhnung berah khan Constitution chhut thar kha MP Lok Sabha leh Rajya Sabha te hnenah an sem vak mai a. India dan bua Preamble a Secular leh Socialist tih hi an paih daih mai a. Kristian tan a pawi leh zual em em a ni,” a ti.
BJP sorkarin Forest Ammendment Act an pass tak kha Mizoram tan a pawi em em tiin a sawi a, tunah hian kan duh ang anga kan ram kan hman theihna tur a awm tawh lo a, kan ram hi an duh duhin min chhuh thei tihna a ni tiin, thlamuang taka awm thei kan ni tawh lo a, BJP-ina an fin kherek hmanga Mizo Kristian min dozia hi Mizo mipui te’n ngaihtuah chiang ang u, a ti.
“BJP hian kan Kristianna tidal tura an luhka atana regional party MNF an hman dante hi chhut chiang ila. ZPM te pawhin sorkarna lo siam palh ta se BJP hmanrua tho tur an nih thu an hotute ka atang pawhin kan hriat fo tawh hi,” Lalsawta chuan a ti.
SSA zirtirtute harsatna chinfel tiam
